【Viu】「第四十一屆香港電影金像獎」事隔四年重返香港文化中心舉行，今日由王丹妮、胡子彤、「小野」盧鎮業、陳健朗公布入圍名單。「香港電影金像獎協會」董事局主席爾冬陞指今屆有33部入圍電影，第一、二輪投票率達百分之58%，合共超過2100名選民。
近日極具爭議性嘅紀錄片《給十九歲的我》有三項提名，包括「最佳電影」、「最佳導演」、「最佳剪接」，喺宣讀入圍名單後《給》組決定退出金像獎遴選，爾冬陞指因未正式收到對方嘅正式退選通知，加上又未同董事局開會，現不作任何假設性回應，會密切關注謹慎處理，問到挽留係咪其中一項選項？佢則表示唔清楚。
去年王丹妮奪「最佳新演員」，眨吓眼今年壓軸出場宣布提名名單，佢話心情較輕鬆，同小野都喜見有好多朋友入圍，更異口同聲話心水電影喺《窄路微塵》。小野同女友Fish廖子妤拍拖多年，至近日先正式公開，佢笑話其實冇特別收埋戀情，身邊亦有好多朋友知。情人節將至，佢話Fish要綵排《飯戲攻心》舞台劇版，睇吓有冇機會去探班，又心痛話見女友日練10至12個鐘明顯瘦咗，但同時覺得女友難得擔正要全力支持，以唔打擾做最好嘅慰勞戰略。
