英格蘭門將「手榴彈助攻」　英超3雄搶人

最強博彩盤路過關神器《串績王》：http://win.on.cc/football/　

英格蘭喺世盃外出副選對安道爾，效力英冠西布朗嘅門將森莊士東有機會正選上陣，雖然安道爾全場1次射門仲要唔中龍，但森莊士東依然搵到表演機會，完場前用手掟個波上前場反擊，直接助攻基亞利殊入波，認真犀利！

28歲嘅森莊士東今場勁得閒，尾後安道爾罰球斬入禁區，佢接波後第1時間反擊用手掟個波上前場，妙到毫巔咁落喺基亞利殊腳下，後者推入禁區為英格蘭射成5比0。意外錄得助攻嘅森莊士東，係自2017年10月波斯尼亞嘅比高域後，第1個喺世盃外歐洲區交出助攻嘅門將。

森莊士東今季隨西布朗降落英冠，但仍然獲領隊修夫基信任做2號門將，由於佢同西布朗合約到季尾完結，英國《太陽報》指修咸頓打算明年1月搶人，而熱刺同韋斯咸亦準備加入戰團，相信森莊士東好快就可以回歸英超。