阿仙奴爭霸靠恐怖防守　一個畫面揭開玄機

踏入2024年後，阿仙奴喺英超11場聯賽打出10勝1和走勢，今季係全英超入波最多(75球)之外，亦係失球最少(24球)，近11場有7場保持不失，今仗更創下球會近27年來首次連續5場作客「零封」紀錄，銅牆鐵壁成為今季爭霸最可信賴嘅武器。

阿仙奴由後防到前鋒都不惜氣力做好防守，今場領先3比0大局已定後，中堅加比爾馬加希斯曾瞓身擋出白禮頓射門，完成封阻後即同隊友激情慶祝，好似入波一樣。呢一幕就獲領隊阿迪達讚揚：「贏緊3球都有呢種反應，所有教練都樂於見到，因為代表球員有幾上心、有幾重視每1球波，呢一幕為今場勝仗錦上添花。」

今仗亦係阿仙奴門將大衞拉耶今季第12場不失球賽事，目前喺「金手套」排名遙遙領先，第2位愛華頓門將比克福特只有9場不失球，賓特尼奴(富咸)、奧拿拿(曼聯)同艾達臣摩拉斯(曼城)各有8場不失球。