紅館騷年卅晚開鑼 鄭中基自爆唔敢請嘉賓

闊別紅館十年的鄭中基（Ronald），宣布於農曆年卅晚至大年初二（1月27至29日）假紅館舉行三場演唱會，Ronald直言過去十年曾七次入紙申請紅館檔期卻不得要領，豈料早前在澳鬥開騷時，突然接獲通知獲批檔期，令他喜出望外。

鄭中基昨日西裝骨骨現身演唱會記者會，席上宣布演唱會門票今日公開發售。提到十年終獲批紅館檔期，Ronald直認以前太「老定」，以為入紙好容易有檔期，估不到申請七次都未獲批。

Ronald受訪時笑言多年來留下一堆飛債，要開午夜場才可以「還債」，他更表示：「依家啲朋友個個都話要飛好過我派利市喎。」問他會否考慮加場？他苦笑謂：「我無所謂呀，隊band都要瞓㗎。至於開日場，都要視乎主辦單位點搞。」

或考慮開日場

問到Ronald會否邀請嘉賓？他笑言：「我都想㗎，不過農曆年，人哋可能去旅行。」他透露女兒最喜歡唱歌，但就堅持不唱他的歌；而鄭中基的爸爸鄭東漢都嚷着要上台唱埋一份。「佢嫌我啲歌太慢，顯示唔到佢（彈結他）威力！」

採訪：Pauline

編輯：林梓添

設計：招潤洪