MIRROR成員李駿傑(Jeremy)最新單曲〈唯美本尊〉MV早前已經上架，還有填詞的Serrini驚喜客串。原來之後Jeremy就密謀找Serrini錄製特別合唱版，MV亦都正式上架。
Serrini在上次〈唯美本尊〉MV中客串時演出住在Jeremy樓下的鄰居，其實Serrini當日有向Jeremy教路如何演繹這首歌，Jeremy說：「當日Serrini有教我點樣去唱呢份詞，同我解釋點解咁寫，要擺咩語氣會好啲 ，我聽住佢唱，就覺得，啊！佢唱得好好聽啊！唔得，真係要同佢合作，所以拍完MV嗰晚就即刻WhatsApp花姐，問可唔可以合唱，然後再有同事幫忙，促成呢件事。」近日Serrini都旅居外地，只是剛巧另有工作安排要回港一趟，就趁機抽空錄音拍MV。
合唱版的〈唯美本尊〉沒有特別轉Key，但Serrini想加點新意，她說：「唔想就咁和音，好似冇乜意思，所以我加咗好多Melody，同埋好似Answer Back嘅嘢，而家似新作品。」Jeremy表示很喜歡這個版本，說：「當日錄音係我錄先，跟住Serrini錄，本來我錄完就可以走，但我唔肯走，要留喺度聽埋先。之前我聽到冇任何混音嘅版本都已經好好聽！到聽到完整版本，係非常鍾意。」Serrini大讚Jeremy專業：「我係幾Surprise Jeremy把聲幾入咪，同埋佢一嚟到就話食咗嘢OK可以即刻錄。監製驚佢嚟自男團，要跳舞，唱歌會唔會要多啲時間Warm Up，又唔係，一入嚟就Ready，歌詞又唔使睇！」Jeremy聽到這裡即說：「自己歌嘛！如果唱唔到好大鑊，哈！」
其實在製作〈唯美本尊〉之始，Jeremy只是簡單地寫了短短的內容，他回憶內容道：「其實嗰陣我係想話，世界有好多負能量，有好多唔好嘅人與事喺我哋身邊發生，好多時候我哋冇辦法去改變佢，最多只能忽視佢，希望用呢首歌教大家點樣去忽視呢啲事情。我冇特登去諗擺啲乜嘢形象落去呢首歌裡面，但係Serrini就為我賦予咗本尊嘅形象。」Serrini亦解釋到她很想將Jeremy提到的負面情緒，變成了正能量，她道：「Jeremy寫嘅幾句嘢太簡單，要深入啲，仲要將我自己成日幻想啲囝囝應該係咩樣，就安喺佢身上。因為我好鍾意〈半〉嘅MV造型，係諗住嗰個樣嚟寫，而歌名如果用『唯我獨尊』太過硬，然後就諗到『唯美本尊』，因為我哋成日覺得Jeremy好靚，但點樣再Elegant啲？而家佢染金毛就更加係『唯美本尊』嘅樣。」
而這個唯美形象的Jeremy，除了在早前〈唯美本尊〉MV出現外，今次在特別版MV中亦再度現身，因為這個特別版MV，是上回的故事延續，Serrini道：「上次客串我亂噏話自己係住樓下個女人，今次想故事延續，一個著綠色絲絨衫嘅女人返到屋企換衫，就換咗好Casual T恤質地嘅裙，遇到Jeremy㩒門鐘到訪。」要知道Serrini向來都是鬼主意多多，性格隨和又不拘小節，在拍攝這個特別版MV時，便展現了她的獨有風格，但Jeremy卻表現緊張，Serrini大爆：「頭先拍MV時，要Jeremy挨埋嚟，佢好似唔知點算好，勁緊張，好有趣！」Jeremy難為情表示：「係呀，我驚你介意呀！」