當產假遇上公眾假期 紅日有無得另補？

以前曾經羨慕公司啲大肚婆，覺得陀B都幾好吖，做產檢可以奉旨攞病假，臨盤之際又可放前四後六嘅有薪產假，放個悠長假期，你話幾爽呀？

直至自己生咗仔，先至明白箇中辛酸。無論你有幾多時間，對住初生BB根本唔夠用，唔夠瞓又要起身餵奶，仲未計三日唔埋兩日帶佢去健康院，簡直人都癲。

不過言歸正傳，有產假、有糧出已經幫大忙。朋友早年嫁去美國就無呢啲福利，未坐好月已要復工，真係戥佢辛苦。講起產假，話說我喺懷孕初期同公司傾產假嗰陣，先發覺自己對此有唔少誤解，經消化後分享以下3大重點︰

1. 10星期產假，連周六日計算

一直以為放產假好似攞Annual Leave（AL）咁，平時7日旅行，扣除星期六、日，只要攞5日假就得，所以我開初仲妄想，有10星期產假、即係有70日AL可用，以5天工作嘅思維計算，仲以為自己可放14個星期大假，結果當然係畀人事部姐姐笑我「很傻很天真」啦！總之，10星期產假係連埋星期六、日咁計，唔會畀多你。

2. 產假撞公眾假期，無得補

若然咁好彩，喺法定假期間放產假，唔好意思，公司都唔會補畀你。難怪曾經聽過啲媽媽因為喺聖誕、新年時放產假而變相蝕咗。

3. 產假期間，人工8折

根據勞工處資料，產假期間嘅人工，係以過去12個月每日平均工資嘅五分之四計算，簡單嚟講就係出8成人工。有啲福利好嘅公司會full paid畀員工，可惜這些機會不屬於我呢。

全文刊於《晴報》

《晴報》Facebook

【延伸閱讀】80後P牌媽咪：未夠三個月唔講得？

【延伸閱讀】傳昆凌今早剖腹生子　中醫教開刀後進補宜忌

【延伸閱讀】陳敏之產後只肥7磅　Keep Fit 餐單大公開