晚餐說要排6個月 LUNCH 就好點, 4個多月 11月訂到而家的小菜館 望穿秋水, 終於到了 菜館既環境比較精緻,係小菜館既形式 會有碗筷, 酒杯等等放左係度 枱與枱之間好窄 食飯個陣D 侍應行黎行去, 都FEEL 到就黎撞膊 現場有4人台4張, 6-8 人台一張, 估計應該仲有一張係好入, 不過我地見唔到 所以可坐到20...多個人左右, 唔怪得郁下就要排4-6個月起 朋友說, 「今日唔知聽日事, 有得食好食」 咁又係, 叫多左咪打包, 而且都排左成幾個月 所以以下既份量係叫多左 ****** ➽ 少爺焗豬扒飯 6人份量(起) $510 (預左食唔晒打包, 最後淨返6成打包了) 個汁好好食! 面有滿滿既芝士 個蕃茄汁好香好濃, 甜甜酸酸 而且有好多切粒既蕃茄粒同洋蔥粒係個汁度, 增加口感 佢仲會跟6隻荷包蛋 荷包蛋煎得好香, 而且落左D 鼓油 將隻荷包蛋放上每碗豬扒飯上面, 再篤穿隻蛋 … 美食... 我同朋友講, 淨係食個汁撈飯就夠啦 其實唔洗要豬扒, 佢已經變左做配料 個豬扒炸過黎, 豬扒肉口感普通OK 我同朋友食, 都SKIP 左好多豬扒 都係話個汁夠好味撈飯 ➽ 杏汁菜膽豬肺湯 $80一位 (有打電話預訂) 一黎到就有好香既杏仁味 豬肺好淋好食 但我同朋友都覺得個湯太多杏仁碎粒 佢應該係落左超多打碎左既杏仁 所以每食一啖都有點點既杏仁碎粒 我覺得如果可以隔走佢個口感會好D, 會滑D 不過整體真係幾香既 ➽百花炸釀蝦多士 $63 一件 一件都唔細, 因為想試多D 野食, 所以我地都係兩個人SHARE 一件 而且, 佢既蝦肉好多, 好厚身 多士鮮炸香脆, 好味! ➽茶香煙燻雞半隻 $300 (有打電話預訂) 侍應拎住碟雞未放落黎已經嗅到好香茶煙味 肉質都幾滑 而且個皮真係好好食 好香茶味 佢會俾一碟類似鼓油汁既俾你沾雞 個汁係幾種茶葉溝出黎既汁 沾左係令隻雞更香 ➽千層咕嚕肉 $148 有趣 咬開左, 係真係見到有幾層既肉 個肉質感我覺得有D 唔夠汁, 雖然都有肥肉, 但唔夠JUICY 覺得還可以吧 ****** 整體說, 呢一餐係幾好食 你話值唔值得等幾個月? 都OK 既, 訂左咪HEA 等 會唔會再食? 我即場訂左下一次食啦, 佛系等, 哈哈 因為我見有人食炸乳鴿, 蒸馬友, 蟹炒腸粉, 都好似好吸引, 下次想試埋! 希望下次多D 人, 可以試多D 野 同侍應閒談, 問佢老闆係咪就係廚師? 佢話唔係, 老闆係一位牙醫 哦, 廚師唔係老闆, 點都驚有日個水準唔同左, 或者佢自立門戶 睇黎盡早食多次都好, 哈哈 今次人均💰$499 其實叫多左野食, 預左打包 (有6成豬扒食唔晒, 千層咕嚕肉接近冇食) 大約計過食量, 其實應該係大約人均$360更多