龔嘉欣近年除幕前演出，更涉足飲食界，去年與日籍蛋糕烘焙大師兼緋聞男友松岡哲合作開餐廳，郎才女貌相當合襯，嘉欣更開到口想結婚生仔，但就不會主動求婚，現在唔再設定一個結婚歲數，想在事業上再衝刺攞視后。

去年嘉欣拍劇雖然不多，但她與視帝陳豪主演的《新四十二章》，以及與張振朗主演的《靈戲逼人》，就同時成為無綫去年排名第四名的其中兩套劇集，後者更在「亞洲影藝創意大獎」中贏得「最佳喜劇節目」殊榮。

為《靈戲逼人》續集度橋

對於去年的成績，嘉欣覺得都不俗，年頭播《新四十二章》，接着年中播《靈戲逼人》，兩套劇可給予觀眾不同的她，一個是演生鬍鬚的鰲拜，而另一個是女鬼，同振朗有一段人鬼情，她說：「最驚喜係大家鍾意睇，因為除咗搞笑之外，仲有好多感動位，最開心係觀眾鍾意，反應係我哋意料之外。」嘉欣透露與振朗正為續集度橋，他們都知道續集要超越第一輯唔容易，希望可以保留浪漫、輕鬆及搞笑元素，組識好故事後就向監製sell橋。上一輯悲劇收場，至於續集會否想大團圓結局？嘉欣卻鍾意悲劇收場：「我好衰，我好鍾意悲劇，最尾個心一定要『乸』一『乸』，會印象深刻啲。」

除了幕前演出，同時還要兼顧餐廳生意，去年8月成立個人品牌的嘉欣，與松岡哲合作開餐廳，嘉欣表示整體生意都OK，但就未計數是否已回本，因為有飲食集團一齊投資，變相有一個好好哋支持，而最開心見到小朋友貼着個櫥窗睇蛋糕，見到他們笑得好開心。愛親力親為的嘉欣，不用拍劇便會返餐廳打點及幫手，有時外地食客見到她亦大感意外。嘉欣謂自己會不定時落餐廳，問到是否要盯着員工工作？她否認道：「我鍾意落去同大家、同事傾偈，佢哋真係好辛苦，有時見佢哋食飯、去洗手間嘅時間都冇，盡量幫到就幫，始終我都有正職。」訪問時嘉欣就不時接到員工的電話，老闆娘的確不易為。

與松岡哲有商有量

因劇集在大灣區播映而令內地觀眾認識的嘉欣，又可想趁機在大灣區開分店？她坦言能力上暫時未能做到：「𠵱家我要兩邊兼顧覺得係有啲難度，所以唔敢去諗住。」問到與緋聞男友松岡哲合作，二人會否有拗撬？嘉欣承認二人曾有拗撬：「我個人鍾意有咩都直接講出嚟商量，大鬧就一定唔會，大家都較成熟，想解決件事。」

事業穩定，當然亦想感情有着落，見到身邊閨蜜都相繼結婚生仔，34歲的嘉欣亦開到口想結婚生仔，還以為嘉欣有意公開戀情，她笑稱都是得個想字：「唔係咁容易囉，加上未有對象，同埋要諗對方嘅諗法係點，（會唔會主動求婚？）我鍾意被求婚多啲。」嘉欣堅持不承認戀情。不過她就承認好喜歡小朋友，平日亦幫好姊妹陳凱琳湊仔，但她亦明白照顧家庭及小朋友的責任好大，故要諗清楚及準備好才會行這一步。問到可會打破陳凱琳生3個的紀錄？嘉欣聞言即大叫冇可能：「生1個係基本，（會唔會先有B後結婚？）我希望結婚先，跟住一步一步去行。」

嘉欣笑指以前對婚姻曾有憧憬，曾想過25歲結婚，之後就推遲到30歲，現在就索性唔再設定一個結婚歲數，想在事業上再衝刺。問到是否想贏埋視后才結婚？多次與視后獎項擦身而過的嘉欣坦白說：「我覺得攞咗就圓滿啲，但攞獎牽涉天時、地利、人和。」談到新年願望，嘉欣稱現在沒去想太多反而更開心，有工作便盡力去做好，過好每一天，且人漸長大開始接觸到生老病死，覺得沒有東西比健康更緊要。

採訪：香港文匯報記者 梁靜儀

化妝：Henry Li 髮型：Sue Cheung

場地：K11 Glasshouse greenery

攝影：黃艾力