馮寶寶回復狀態

現年六十四歲嘅馮寶寶（BoBo姐），近年移居檳城，今年六月去曼谷旅行時發生車禍，後來再喺吉隆坡接受鼻骨矯形手術，經休養一輪，佢嘅狀態已經回復十足十，原來仲飛咗嚟香港開工，拍緊林家棟監製嘅新戲《殺出個黃昏》。
日前早上九點鐘，set行頭、化行妝嘅BoBo姐，身穿綠色嘅晚裝裙，現身喺廟街一間懷舊歌廳進行拍攝。東姑見佢心情大好，同啲劇組人員有講有笑，跟住即踩入片場。至中午十二點幾，謝賢（四哥）同林雪再陸續抵達。由於劇組係包場室內拍攝，搞到一眾街坊冇明星睇。幸好到下午四時左右，身為監製嘅林家棟連同一眾藝人走出門囗拜神，成條街即時滿布街坊，不知幾咁熱鬧。當中，身穿露肩裝嘅BoBo姐，就大晒白滑香肩同玉背，艷光四射；而向來有風度嘅四哥，仲全程護住佢添。
因為不少街坊都係上咗年紀，對BoBo姐同四哥較熟悉，不斷大讚︰「BoBo姐瘦咗又靚咗！」、「四哥好fit喎！」????得佢哋兩個笑到四萬咁口。而在場嘅後輩李燦琛、何雁詩、賈曉晨、顏子菲同林雪等，亦好識做咁讓佢哋企中間兼主持儀式，當然唔敢搶佢哋風頭。跟住，佢哋拜完神，就入返歌廳繼續開工，拍到凌晨十二點咁滯， BoBo姐拍足十幾粒鐘，都真係好堅！

BoBo姐一出場，林家棟同四哥即小心翼翼咁護住佢。

身穿小背心嘅顏子菲，大晒清涼裝；相反，產女後嘅賈曉晨，似乎仍未收身，難怪着得咁密實。