辛祖重返多蒙特　夏蘭特贈佢一個字

查頓辛祖正式落實由曼聯外借返多蒙特之後，昔日同佢喺「蜜蜂兵團」合作過嘅曼城射手艾寧夏蘭特不忘贈興，喺社交網上載查頓辛祖身穿多蒙特10號球衣嘅相片，加上英文「beautiful(美麗)」及心心眼符號，似乎好羨慕辛祖可以重返多蒙特。

艾寧夏蘭特曾經同查頓辛祖喺多蒙特做過18個月隊友，堪稱「黃金拍檔」，2人其後分別轉投曼市雙雄，但際遇卻有天壤之別，夏蘭特協助曼城成為五冠王，反觀辛祖長期表現低迷，近幾個月更加被領隊坦哈格雪藏，依家總算脫離苦海，夏蘭特以一個字beautiful，祝福查頓辛祖華麗轉身成功。