【明報專訊】漁護署現時會用人手點算到訪郊野公園嘅遊人數目，佢哋2022年喺香港仔同大欖郊野公園嘅多個入口安裝咗28部自動人數點算器，利用紅外線感應器記錄人數，結果發現單喺呢兩個郊園，舊年錄得遊客流量分別有90萬同110萬人次。部門對比同年以人手點算數字，發現自動點算器較人手點算數字高出約70%，顯示人手點算低估咗遊客流量。
年內新界中港島郊園裝60部
漁護署轄下郊野公園及海岸公園委員會今日（7日）開會傾應用科技管理郊野公園和海岸公園議題，據文件顯示，署方計劃將自動人數點算器擴展去其他郊園，首批約60部會喺今年底前安裝於新界中部同港島嘅郊野公園內，估計安裝同運作費用約270萬元。
漁護署話，除咗記錄遊客數目，自動點算器系統亦可提供唔同地點、時間嘅遊客流量同分佈等資訊，有助管理工作。佢哋舉例話，香港仔郊野公園嘅香港仔水塘道入口同大欖郊野公園嘅大棠山道入口錄得嘅遊客，分別佔呢兩個郊野公園總遊客人數約36%同22%，顯示呢兩個入口對遊客好重要，數字亦顯示呢兩個郊園喺周末錄得最多遊客。