【明報專訊】第60屆台灣金馬獎今晚揭曉，本港新晉導演卓亦謙噚日憑《年少日記》率先奪得「觀眾票選最佳影片」，原來卓導爸爸係政務司副司長卓永興。卓永興透過新聞秘書同Emily確認，稱「作為父母，兒子有自己喜愛的工作，我十分高興。希望他繼續努力，活出自己的一片天」。
《年少日記》係創意香港資助首部劇情片，探討學童自殺問題，獲金馬獎最佳劇情片同最佳新導演等5項提名。咁啱特首李家超近日亦指示卓永興處理學童自殺問題，並敦促勞福局、教育局同醫衛局配合。兩父子喺唔同領域關注學童自殺。
一齊關注學童自殺問題
噚日另一套電影發展基金資助嘅本港電影《但願人長久》亦獲金馬影展頒發「國際影評人費比西獎」，Emily向文體旅局查詢，會唔會恭賀兩套本港電影得獎，截稿前就未有回覆。
2018年金馬獎有得獎者發表台獨言論之後，內地國家電影局宣布暫停內地電影參加金馬獎。近年港府亦較少恭賀獲金馬獎嘅本港電影，上一次係2016年電影發展局透過政府新聞處恭賀「首部劇情電影計劃」優勝電影《一念無明》導演黃進同演員金燕玲，分別奪得金馬獎最佳新導演同最佳女配角。