有望成為第二個周星馳? 周嘉洛直言冇可能同佢比
無綫處境劇《愛‧回家之開心速遞》一向都係收視保證,劇集貼地又搞笑係唔少香港人嘅送飯之選,唔少劇中演員更憑角色成功入屋,當中包括飾演「廢青安」金城安嘅周嘉洛。對於劇集衝破一千集,劇中演員都表示好開心,而憑此劇獲得《萬千星輝頒獎典禮2019》「最佳男配角獎」嘅周嘉洛就話好開心,如果可以劇集邁向2000集直頭係歷史。
周嘉洛將金城安呢個角色發揮得淋漓盡致,深得觀眾喜愛。佢為咗呢個角色都可以去到好盡,曾經試過多次赤裸上身,佢最近更加男扮女裝示人。劇情講述佢唔想再有女同學被醫生非禮,於是佢男扮女裝扮睇醫生將醫生繩之於法。嗰集出街後,點知網民紛紛留言讚佢索同靚女,又話佢反串完全冇違和感,仲靚過Bonnie同熊心如添呀!
周嘉洛就話係化裝師功勞,將腐朽化為神奇。對於有觀眾話佢有初出道周星馳嘅影子,有可能成為第二個周星馳,佢就話不敢當,因為周星馳太勁啦, 佢絕對唔能夠同周星馳比。而佢都冇刻意模仿周星馳,可能開始拍戲嗰陣參考自己鍾意嘅演員,不過而家想搵返自己個人特色。