【百萬Blogger】財叔：Call Loan的真相

繼爆煲論後，近期湯文亮博士同林一鳴兩位前輩又在空氣中討論有關Call Loan真與假（編按：即要求按揭貸款者「提早償還」），當我睇完兩位前輩的文章後，發覺其實兩位的觀點也沒錯，只是因為兩個人的背景與位置不同，所以才會有如此大分歧吧！

何解我會如此清楚他們的觀點沒錯？因為我經歷過金融風暴、沙士、金融海嘯、負資產和Call Loan，統統試過，憑我的經驗來講，可以說兩位前輩的觀點都無錯。

用家被Call Loan機會微

其實問題是湯博士基於一個投資者角度出發，而林一鳴就基於一個用家的角度去講。老實說，我絕對同意林一鳴所說，如果你每月準時供款，就算負資產，其實都不會被Call Loan，因為如果你負資產，銀行迫死你有何好處呢？當然有讀者第一個反應會話，真係有架喎！係？你唔好話俾我知，係朋友個朋友試過喎！如果有讀者親身經歷只有一層自住樓又準時供款，但負資產時被人Call Loan，歡迎指正，不過這個人我搵咗超過10年都未搵到。

又何解我又話湯博士無錯呢？因為如果你是一個投資者或生意人，Call Loan的機會就大好多了。因為當銀行將你的資產作一籃子評估後，發現有部分物業負資產，如果銀行此時Call Loan，的確可減低他們未來可能遇到的損失，所以湯博士亦講得無錯。

其實有沒有辦法避免Call Loan呢？當然有啦！如果你是生意人，你生意往來的銀行最好就不同於你做按揭的銀行。又如果你擁有好多物業，就最好不要集中在同一間銀行。即使如此，還有無機會被人Call Loan呢？有！這就是我的親身經歷。

同一銀行再按被追差價

話說十幾年前我有一層負資產的樓，約負資產100萬元左右，當時其實負咗幾年都相安無事，但當我再置業的時候，以為已和銀行有感情，所以又去搵同一間銀行做按揭，審批亦相當順利，但誰知成交前一星期，銀行竟然通知我，如果要順利成交的話，就要先償還之前負資產物業的差價。

所以，不要一本通書睇到老，雖然按揭是有抵押品的貸款，但投資涉及風險，物業價格可能會波動，投資者可能要償還全部或部分按揭金額，閣下應自行評估風險及閱讀有關按揭文件。如有需要，閣下應諮詢專業人士……（下刪數百字）。所以睇文章時，不單止要睇文章內容，作者背景才是關鍵。

本文原刊於2015年5月9日第394期《iMoney Focus》。