世紀見面︱言承旭重遇吳建豪講心結：感覺更近了

當年憑台劇《流星花園》走紅、台灣男團始祖F4成員依家都陸續攻入內地市場，去年言承旭參加內地綜藝《披荊斬棘的哥哥》而再度爆紅，今年就有吳建豪參戰《追光吧！哥哥》而再受到關注，估唔到今次二人為咗真人騷《朋友請聽好2》終於再度世紀見面！言承旭同吳建豪前後腳成為節目驚喜嘉賓，言承旭先入場同大家打招呼，佢一坐低就到吳建豪現身大門外，而二人終於見面時，言承旭更伸出友誼之手捉實吳建豪齊齊入屋。

之後吳建豪又同言承旭再唱當年捧紅二人嘅台劇《流星花園》片尾曲，吳建豪結他彈唱，言承旭一邊煮飯一邊合唱。去到尾聲言承旭自己煮麵做消夜時，吳建豪就搵到一段F4第一次到去香港嘅視頻，言承旭睇到笑晒口之後仲將視頻轉發畀F4另一成員周渝民，又拍片同周渝民拜年。事後言承旭坦承呢個節目令佢同吳建豪「更近了」，彼此都放下一啲嘢，冇必要執着於任何嘢，而吳建豪則講起F4解散時嘅心結，係因為大家都冇做好準備，先會有咁樣嘅結果出現。