响《審死官》入面，梅艷芳拍住無厘頭嘅周星馳一啲都唔輸蝕，發揮出搞笑細胞。飾演武功高強、「食住」老公嘅佢，將霸氣巴辣、溫柔賢淑嘅角色性格共冶一爐，演技收放自如。去到之後嘅《鍾無艷》，梅艷芳反串做鹹濕男角齊宣王，遊走於鄭秀文同張柏芝兩個女人之中，唔單止無被搶戲，嗰角色仲非常突出。

不過講到梅艷芳嘅「電影之最」，不得不數八十年代尾嘅《胭脂扣》，套戲由梅艷芳同另一位巨星張國榮擔正，演繹出塘西風月嘅哀怨纏綿。根據報道，原本張國榮嘅角色十二少係由鄭少秋飾演，不過後尾沈殿霞懷孕，鄭少秋辭演，最後大家先見到梅艷芳同張國榮嘅經典組合。而梅艷芳憑住《胭脂扣》嘅精彩演出，於金馬獎、金像獎同亞太影展中三度封后。

劇照嚟自網絡。