高海寧怒摑江疏影網民彈未夠班

高海寧在內地劇《三十而已》掌摑女主角江疏影成為網民熱話，人氣上升的她坦言觀眾反應超出預期。對於網民批評她未夠班掌摑對方，高海寧認為只是少數人的睇法，並透露試戲時被對方嫌摑得細力！

楊明、高海寧（高Ling）及陳曉華等，昨日在將軍澳電視城宣傳無綫新劇《迷網》。高Ling演出內地劇《三十而已》掌摑女主角江疏影一幕，最近引起內地網民討論，她表示：「好開心，只係客串幾場，冇諗過咁有話題性。（網民話你唔夠資格摑江疏影？）呢啲只係個別人嘅睇法，場戲九成九嘅人都話好睇，唔會唔開心。我只係拍咗兩日，開工第二場戲就拍掌摑戲，初時唔知係真打定借位，事前有溝通，佢仲嫌我打得唔夠力！導演用四部機要求一Take過拍，最後兩Take搞掂。（人氣升，帶挈內地搵銀？）冇諗賺錢，只係當體驗，但效果超出預期，希望將來有機會再拍。」

講對白似急口令

至於陳曉華處女拍劇，笑言睇劇時很尷尬：「覺得自己好多地方不足，演繹唔係好自然，講嘢聲線太高音，已經讀咗報紙兩星期，希望有改善。第一次拍劇驚NG，所以講嘢好快，自己配音時都跟唔上。」她又透露近日為新劇《異搜店》拍廠景：「開工時做足防疫措施，未埋位唔會除口罩，同埋會攞住啲消毒噴霧周圍噴。」

楊明生意受挫

另外，楊明是五間燉湯店的老闆，昨日是食肆首日實施全日禁止堂食，問到生意是否大受影響？他說：「未睇到實質數字，但係之前禁晚市堂食，五間舖生意已經跌咗三、四成，雖然唔樂觀，但希望配合政府措施抗疫，一齊捱過去。（最壞打算會閂一、兩間舖？）唔排除，但會盡量安排長工開工。」