淚與汗成就夢想 兄弟幫撑陳國峰處男騷

「巨聲幫」陳國峰（Penny）前晚在旺角麥花臣場館舉行首個個人演唱會，雖然只得一晚，但獲不少圈中好友撑場。Penny唱出自己新歌《大器未成》，其餘幾乎全部是別人的歌，還有幾位兄弟幫上台爆料，氣氛一流。

前晚到場欣賞的藝人包括李佳芯、高海寧、孫慧雪及羅孝勇等，Penny的太太及19個月大兒子捧足全場。羅敏莊、吳業坤、謝東閔擔任嘉賓，羅敏莊與陳國峰合唱《挑戰者》，她更抵死表示︰「有人以為係我老公陳國邦開演唱會，咁就遺害人間！」引來全場哄笑。

之後輪到「兄弟幫」林盛斌（阿Bob）、王梓軒、梁競徽（唯唯）及范振鋒上台與Penny合唱《千載不變》，眾人又搞笑扮不和，身為Penny前輩的范振鋒表示︰「我出過幾隻碟，我都未開演唱會。」Penny即詐傻反問︰「你幾時出過碟？」

望兩年後再開個唱

至於快歌部分，Penny唱出郭富城的《鐵幕誘惑》、《第四晚心情》及《雨中感嘆號》等勁歌熱舞，身穿黑色魚網衫的他，一身結實胸肌若隱若現，他其後表示︰「係咪無嘢睇？我太太都鼓勵我除衫。」隨即半裸示人，邊騷胸肌邊震波，令台下尖叫聲不絕。

完騷後，Penny直言今次是一個很好的里程碑，他說︰「我夢想一直係唱歌，但唔知自己係咪歌手，好感恩今次好多人幫手。我畀自己70分，仲有進步空間，希望兩年後可以再開騷，會努力啲喺樂壇蒲頭。（唱親情歌好感觸？）由細到大好似無咩成就畀父母，今晚係一個小成就。」

撰文：倪小珊