《香港愛情故事》游嘉欣人氣急升 好pure好true中學素顏照曝光
小品愛情劇《香港愛情故事》因題材貼地及演員發揮超乎想像,獲得一致好評。劇中唔少演員人氣急升,當中包括首次拍劇嘅游嘉欣(Kayan),佢喺劇中飾演陳子朗(羅天宇飾)細妹陳子婷,係一個住公屋嘅拜金港女,因一腳踏兩船而被網絡欺凌。雖然係咁,佢身邊仍然有一個默默守護佢嘅「萬能兵」邱凱傑(林正峰飾),最後佢哋冇喺埋一齊,不過感情更進一步。 另外,曾經指自己係A0嘅游嘉欣,學生時期嘅相片曝光,素顏嘅佢雙眼精靈又青春,外貌同而家變化不大,真係好pure好true呀!
只有20歲嘅游嘉欣(Kayan)就讀城市大學嘅管理學系,喺讀大學一年級時被《電競王》PA相中而入行。雖然佢入行時間好短,但已經有唔少演出機會,除咗擔任《#後生仔傾吓偈》主持及做《天天開運王》嘉賓之外,佢亦開始參與劇集拍攝,例如《香港愛情故事》、《使徒行者3》及《刑偵日記》。游嘉欣憑《香港愛情故事》自然唔做作嘅演技,入屋成功。唔少網民仲話佢樣子甜美,個樣仲同朱千雪及湯洛雯有幾分相似,更被封為湯洛雯接班人。
按此下載全新應用程式Yahoo APP,並以Yahoo電郵免費登記成為會員,即時可完成簡單任務賺取Ypoints,憑分即可換領不同獎賞! 新人更可即時換領限量新人禮,立即下載!