豆敏西牛胡肉羹 ﹗

奧志雷等級4 2018-07-17

378 瀏覽

終於都癲娜，聽日後日大後日繼續操！閉關練功，心情不爽！情緒欠佳！勿擾！謝謝。操完又白廢，忍唔到口勁胃食無得醫，怪您過份美味無辦法。行去燉奶佬想食西冷無位。行去串燒妹想食大麻辣湯又無位。行去蛇王兄想飲蛇湯食蛇羹，點知突然無開。轉彎去潮興旺想食個魚蛋麵算，拉左閘？原來裝修下個月先開返！有無咁黑仔呀，最終回歸上海小館。情緒惡劣，要飲可樂去去負能量！十一點的晚飯，好疲倦唔想煮，指定菜色酸辣湯，無得頂 ﹗操得咁辛苦梗係要奬勵下自己，勁多料酸辣湯、勁厚蝦仁炒蛋，好耐無試過飽到想嘔既感覺喇，莫非我近來排細食左？酸辣湯，質素保持不變，超多料超好味 ﹗勁酸勁辣，味道特濃，厚薄剛剛好！配料豐富到不得了，塞到滿滿呢。豬大腸、木耳、肉絲、豬大腸、蝦仁、豆腐、筍絲、蛋花，味道非常豐富，不同質感盡在其中，回味無窮。實在太好飲喇，急不及待要全部立即倒晒落肚，熱騰騰滾熱辣燙到起水泡喇 ﹗師傅係咪我成個月無黎，所以加料炮製呢？比平時更多料，成碗湯係滿料！仲多左豬大腸，味道更豐富香甜，夠酸夠辣超級好味！酸辣湯麵，飲勻省港澳，頂級永遠滿分的酸辣湯只得此間！次次都係淨湯，酸辣湯麵第一次試。完全無偷功減料，味道及配料跟我飲開既一模一樣，而且特價粉麵抵到爛，平到 $28 蚊乍﹗原來唔係擔擔麵既？失望，我諗多左喇。比拉麵再次一等既上海麵條，莜麵質地，食不到麵粉香。一般麻麻地不喜歡。鐵板五香雞柳，熱騰騰的鐵板盛著佳餚，鬼殺咁嘈、吱吱喳喳送到，師傅細心地用碗蓋著，免得醬汁射到四圍係，耐心等待她們平靜下來才慢慢拿走。開呀﹗白煙直噴，芬芳氣味飛撲而來，香噴噴啊﹗不太覺得係五香粉味道，反而似薑蔥爆雞柳，有薑、蔥、蔥頭、洋蔥、青椒、蒜頭，大火炒起夠鑊氣，散發強烈香菜香料氣味，食慾大增。雞柳醃味非常甜美，濃郁醬汁，熱辣辣嫩彈細味，夾雜粉爽蒜子、爽脆青椒齊齊嘆，無投訴。椒絲腐乳通菜炒牛肉，一次漏牛肉、一次漏椒絲，笑死我咩 ﹗終於一家團聚喇。特濃腐乳味椒絲味，乳香吸引夠美味。微鬆牛肉醃得不太過份，淡淡牛味，嫩彈可口，滿意。翠綠水通爽嫩多汁，趙到索索聲，撈埋鮮牛肉滑溜溜，送飯一定正到痺，最少食兩碗滿滿白飯啦！淨食有點重口味，雖略咸但好食，都還頂得住！炒菜好貴啊，索價 $63 蚊。雞火津白、雞火白菜、雞油白菜，師傅非常有心機排得雞肉金華火腿齊齊整整，靚靚仔仔出場，兩色相間美侖美奐，狀甚吸晴。新鮮出爐傳來陣陣雞油香氣，爽甜無比的靚菜捲著濃味火腿品嚐，咸香跟菜甜撞得精采非凡；爽甜無比的靚菜捲著結實雞件品嚐，雞油味道甘甜不膩，只是雞肉就有點乾鞋，幸好濕潤的靚菜可補不足之處。烹調可口，所有食材融合打得火熱，迅間被我消滅得一乾二淨。白菜勁甜多汁，完全無苦澀味，但榮發白菜苦澀鞋硬齊晒。次次想食菜芯，都只係得白菜同津白，好心 update 返個 menu 啦，激死我。我要三鮮白菜，最後變左雞火白菜，我都算係熟客成日幫襯認真一點好嗎？三鮮津白，跟雞火差不多，多左蝦球囉。津白都依然爽嫩多汁熱燙燙，但非常淡口，忘記落鹽？有微弱菜甜味。感覺油淋淋，食完漿住喉嚨起晒痰。雪藏雞乾鞋到出奇無醃過完全無味，有雪味，唔怪得等咁耐啦，是否剛解凍呢？蝦爽但無鮮味無甜味。金華火腿咸香油潤，有趙口又甘香，滿意。蝦子炆海參，幾片鮮筍有渣，冬菇好味。原身無味的海參撈蝦子及重味醬油，熱騰騰吃著，美味食唔停，勁震勁彈的海參，彈到醬汁四踐喇。椒鹽排骨，經常使我將排骨、豬扒、豬排混餚囉，依塊我會叫豬扒。喜出望外的演繹，上海椒鹽豬扒剛剛炸起，薄薄脆漿鬆化，不油不厚恰到好處，鎖住肉汁在內，咬扯噴射。甜肉混椒鹽咸辣惹味，質地有嚼勁，不硬不乾。可以沾埋大量甜酸咕嚕汁，開胃醒腦可以減低油膩煎炸感，別有番風味。蝦仁炒蛋，大蝦球不是蝦仁仔那麼簡單，爽爽咸香明蝦，不過火不過咸。炒蛋厚到厚燒玉子一樣，鑊氣迫人滾熱辣，每啖都輕煙飄飄香噴噴。蛋味香甜濃郁，包著蝦球在舌尖翻騰，堅堅堅拍案叫好。火腿白菜湯，足料落重本，勁多金華火腿呢，咸香突出加上香濃菜甜味，超好飲呀 ﹗白菜高質不澀帶甜，無渣無草青味。砂鍋津白，我仲以為淨菜添，點知雜錦鍋來的。有無味爽蝦、雞絲、火腿、豬肚、雞髀菇、竹筍、粉絲！仲驚食唔晒，免強完成啦，飽得很！濃郁津白菜甜味靚湯，好味道。一窩雜錦津白湯濕濕碎啦，全部沽清！大黃魚湯，嬸嬸傳來巨鍋，嚇死朕咩 ﹗應該都飲得晒既。魚湯要那那聲急急趁熱飲先最好味，凍左無咁好飲架。淡淡奶白色黏黏湯汁，魚味濃郁鮮甜，雪菜咸鮮，一邊飲一邊趙，痛快﹗黃魚煎過特別香口鮮甜又可以除去腥味，肉質嫩滑多汁，魚肚膠彈，每個部位都非常好食無得彈，魚骨魚頭魚尾都被我損得半絲肉都無剩！掛住食魚點豉油，再返轉頭飲湯會淡晒囉。紅燒黃花魚，用我最大的耐性等足半個鐘終於出場 ﹗紅燒黃花魚好味道喎，魚味濃郁，魚肉嫩滑多汁。炸得香口開胃，記得要趁熱食，否則蓋不過腥味，必須撈埋濃郁紅燒汁齊齊食，味道提升不少。魚肉配菜冬菇、竹筍、肉片、蒜子更加好味喎。撈飯無得輸，什麼都清晒，菇筍菜蒜全部無得留低。三絲黃鱔羹，熱辣辣送到，香噴噴！嚐一口，香蒜味濃，令我諗起鱔糊撈埋生蒜既味道。湯底十足係酸辣湯只係無落酸辣啫，好好味！但越飲越似碗仔翅湯底，顫顫驚驚加黑醋試試。即時變得同碗仔翅味道一模一樣，非常神奇！黃鱔絲滑彈，肉絲嫩口，筍絲木耳絲勁爽，全部高質心心眼。芽菜炒鱔糊，飽到只係食晒鱔柳同半碟芽菜。特濃醬汁不咸不濁，襯托著爽嫩充滿水份芽菜，即時好食百倍。鱔柳結實，不夠嫩亦不夠彈，整體蠻不錯。椒鹽鱔片，完全誤會晒，係黃鱔柳唔係白鱔片，同我幻想南轅北轍！炸漿厚硬，半點都不鬆化，殼一樣既脆粉加油膩感已完全蓋過黃鱔味道，似食緊硬餅乾，而且椒鹽調得偏咸，浸完喼汁免強可以入口。左諗右諗叫咩餸，洋蔥豬扒？椒鹽肉排？椒鹽鮮魷？最終試椒鹽鱔片啦，還掂未食過。麻婆豆腐，豆腐震騰騰好跌盪地上檯，彈力十足好鬼誘惑！勁滑豆味勁香濃，邊度買架？肉鬆彈彈甜美可口，辣味適中回味無窮。淨食有點咸，試試配湯麵食先。陽春麵，陽春麵係擔擔麵條黎喎，嚥韌有咬口，有蛋香，掛上豉油湯底，還可以。白菜太生食唔到，硬掘掘帶草青味。淨食麻婆豆腐有點油，唔想食飯又無豉油皇炒麵，明明見到menu寫住炒麵轉粗麵加 $10 蚊，但嬏嬏話全部係粗麵真係匪而所思，走既時後我見到食客嘆緊炒幼麵喎。油豆腐粉絲湯，點解係豆卜？唔係一塊塊油豆腐既？兩者口感有分別架喎！普通豉油湯底有點失望。白菜不甜，粉絲夾著冬菇絲筍絲撈上豆瓣醬都還幾好，除左無酸味外，有一刻我覺得似酸辣湯，紅磡珍珍雪菜白菜仔雞湯底好味得多。回鍋肉炒麵，從未食過炒粉麵，以前多次聽到食客要回鍋肉炒麵唔通好好食？試試先。阿姐建議粗麵比較好食，幼麵係炸脆麵來的，但我想食幼麵喎，那就幫我多汁吧。誰知多汁都未能將脆麵軟化，廣東炒麵跟上海炒法不同，而且個汁好杰。甜甜的醬油味，微弱辣味，椰菜、齋叉燒片、五花腩片，麻麻地。下次再試過炒粗麵先，但唔會係回鍋肉，$35 蚊仲平過牛腩雙併湯麵堅抵喎，原來宵夜時段平好多。醉雞翼，開邊想更入味嗎？我只覺得更乾更靯。酒香仍在，先甜後澀，少少雞味，冰涼唔難食。鮮肉鍋貼，實惠只需 $24 蚊有 4 大隻呀 ﹗餃皮跟一般的不同，十分黏嘴的啊，沒有滑溜感覺，厚厚的皮使到食幾隻已好滯。肉餡甜美多汁有彈性，餃底焦香金黃，浸完喼汁直接入口，比小籠包更美味。西湖牛肉羮，清清地西牛胡肉羹！牛肉鐵質蛋白質，西芹降血壓血糖，蘿蔔補腦養顏！健康補身又好味道，洒上胡椒粉香香辣辣，飲得津津有味。繼續閱讀