開病假紙呢個問題,其實好考技巧。開得少,病人唔開心,又要花時間同佢地解釋,開得多,又有機會比病人嘅僱主追究,投訴去醫務委員會話開嘅病假太多唔合理,我哋夾係中間,其實好難做人。
咁其實我哋點知一般應該開幾多病假呢?都有少少其實係約定俗成嘅。以前係政府工作,會有一個指標嘅,乜嘢手術就俾幾多日假,講得好清楚, 有病人問起,就話係部門規定,好少有病人投訴.
淨係講下婦科啦,一般剖腹嘅手術,可以比一個月假期, 微創手術呢,一般比兩星期. 其他陰道鏡啊,子宮嘅呢,嚴格來講係比得一日. 咁小產刮宮呢?大概比一星期左右.
依家諗返轉頭,都覺得...比假期比得太過手緊。尢其小產嗰D, 人哋真係仲未喊完㗎!
依家覺得,都真係要睇返病人嘅工作嘅, 但有啲病人要求小手術都比三個星期假,就真係冇辦法唔拒絕啦!
好老實講, 如果連傷口都冇嘅子宮鏡檢查, 點可能比幾個禮拜休息啦?例如好似做胃鏡咁, 點會放三個星期呢? 如果醫務委員會問起,我哋點樣解釋呢?私家醫生一般都會彈性小小嘅, 不過太誇張, 我哋都真係做唔到, 術語咁講, 都無medical ground ! 希望某啲病人明白, 唔好成日扭計啦!
做左子宮鏡係有少少血流嘅, 但如果唔係發炎又唔係痛.... 少少血, 返得工嘅!