錫菲聯重返英超　希京保頓做英雄

足球博彩神器，每日重心提供盡在《彩報》：http://win.on.cc/football/　

英超下季第2支升班球隊出爐，錫菲聯周四(27日)凌晨英冠主場2比0擊敗西布朗，提前鎖定聯賽亞軍位置，時隔2年重返英超。錫菲聯領隊希京保頓執教18個月，排除萬難幫球隊拎到升班資格，絕對係球會升班最大英雄。

錫菲聯自2021年降班後，成績同財政都出現危機，希京保頓前年11月上任嗰陣，錫菲聯排喺英冠第16位，但佢上季最終幫錫菲聯打入升班附加賽，可惜4強不敵諾定咸森林。今季錫菲聯受到財政問題困擾，今年1月曾被禁止買人，希京保頓更就賣走主力同高層爭執，最終成功留住辛達貝治等核心。

錫菲聯季尾狀態大勇，近7場聯賽贏6場，拋離第3位嘅盧頓7分，提早鎖定前2名，同般尼攜手升上英超。希京保頓賽後表示：「喺我執教嘅18個月內，球隊一直保持高水平表現，冇人比呢班球員更加值得升班。」錫菲聯升班後，未來3年確保會有1.7億鎊(約16.65億港元)收入，對球隊財政極大幫助。