歌手張天賦(MC)和洪嘉豪(Kaho)去年10月在旺角麥花臣舉行《我是現場》音樂會,今年再下一城,將於9月2至4日於九展Starhall舉行《Kaho x MC Frenemy live 2022》演唱會。向來都被粉絲封為「賦豪CP」的兩人第二次合作開騷,MC直言更得心應手,而Kaho就表示一切都在密鑼緊鼓籌備中,更暗示準備了驚喜畀fans!
「賦豪CP」第二次合作開騷
提到第二次合作開show,MC表示相當開心,「今次合作上可以更多元化,會有多一個拍檔可以幫手炒熱個場,搞個show會容易咗。鑑於我哋有第一次合作經驗,今次更得心應手。」Kaho亦表示自己身心都在準備當中,「最緊要係個人fit,狀態、精神、把聲,仲有啲需要綵排吓嘅東西,都密鑼緊鼓籌備緊。」
MC又透露為演唱會準備了三首合唱歌,「兩首輕快、一首緊貼《FRENEMY》主題…」Kaho指歌曲將會在8月中一次過推出,「fans們會好開心,裡面有感動、搞鬼…會喺演唱會第一次唱live,已經係一個好好嘅驚喜。」
「FRENEMY」是敵亦是友
今次演唱會主題叫《FRENEMY》,FRENEMY一詞是「Friend」與「Enemy」的合成詞,意思是指「是敵是友」,MC指這個詞很適合用來形容自己與Kaho的關係,「其實同我哋幾似,本身係朋友,但係工作上,我哋是敵亦是友。是敵是友唔係指真係敵人,係大家喺同一個圈子為自己鍾意嘅嘢奮鬥。」Kaho補充:「係正面競爭,係一個鼓勵,譬如你今次拎第一,下次我拎第一,你會替我開心咁。」
入行以來艱難時期
MC和Kaho識於微時,Kaho指當初兩人都只是純粹喜歡音樂,對音樂有種憧憬,「而家大家總算行緊大家喜歡嘅路,向夢想進發,好開心見到大家成長。」
30歲的Kaho在2018年出道,身為創作歌手的他今年更推出雙碟大碟《Learning Curve》,當中大部份歌曲都由自己創作。Kaho指自己出道後第二年曾經歷過一段艱難的時期,「當時經歷社會問題,加上疫情開始,嗰兩年好難捱,工作少咗,無乜演出機會,曝光少、收入少,嗰段時候要咬緊牙關,真係幾難過嘅時期。」
至於參加ViuTV選秀節目《全民造星II》獲亞軍的MC,在2021年正式出道,推出的《反對無效》、《記憶棉》等都大受好評,年初獲頒發「叱咤樂壇生力軍男歌手金獎」。他亦憶起自己都曾有一段難捱的時間:「我係比賽嗰時,經歷緊比賽嘅壓力,當時亦有經歷家庭問題,對未來好迷惘,嗰時係幾黑暗、難捱。」
點睇「賦豪CP」呢個稱呼?
相識8年,因著對音樂的熱誠及性格投契,兩人產生了意想不到的化學作用,更被不少粉絲稱為「賦豪CP」。問到兩人如何看待呢個稱呼?MC表示自己冇乜所謂,「同埋『賦豪CP』係上一次show主題,我哋分咗手㗎喇!」。Kaho就指:「上一次show啲歌多啲關『賦豪CP』事,今次以《FRENEMY》主題,會以兄弟、友情為主。其實對「賦豪CP」稱呼冇乜所謂,最緊要大家喜歡,我相信我同MC就算係所謂「CP」又好,兄弟又好,大家都會鍾意我哋之間嘅化學作用。」
而在「快問快答」環節,感情甚好的兩人互爆優點、缺點及擇偶條件。講到對方嘅優點,MC及Kaho互戴高帽,Kaho大讚MC:「又靚仔、唱歌又好聽,身材又好,企係佢隔籬會慚愧點解永遠都追趕唔到佢。而MC則好欣賞Kaho的音樂才華,「佢優點係識寫歌,佢好多作品我都非常鍾意!」
至於對方嘅缺點,MC就笑指:「Kaho成日覺得自己好幽默,但係作為朋友,你一定要畀反應佢。」而Kaho則爆MC好鍾意好大力打他的patpat,MC表示:「我會助跑衝上前打佢patpat,見到佢痛會好開心,哈哈!」
問到對方嘅擇偶條件?兩人相識多年當然清楚明白對方,而且理想型完全不同。Kaho率先爆:「Cute!(指MC鍾情可愛型女仔)」MC解釋:「係呀我鍾意可愛啲嘅女仔,細細粒。鑑於我嘅身高,我都希望搵個身型矮小啲嘅女仔。」而Kaho則鍾情於成熟型女仔,「我鍾意思想、打扮成熟啲嘅女仔。」
圖片來源:《晴報》圖片、IG圖片
叱咤樂壇頒獎典禮丨張天賦撼贏Edan獲男新人金獎 炎明熹姚焯菲延後演出親自領獎【下一頁】
on MC :
髮型: Ftanco Chung@ Leonardo 3 Hair Corner
化妝 : Circle Chong
服裝:@implyofficial
ON Kaho :
髮型: Haysses Ip @ HAiR
化妝 : Circle Chong
服裝(tee):initial
服裝(pants): iteshop
撰文:林惠珊
攝影:何家賢、龐浩雲