鍾舒漫 Sherman Chung ︰「最近兩三年，我經歷緊聲音（聲帶）嘅問題，一路好似摧毀我嘅自信、自我形象，令我真係唔想喺呢個世界。」
#香港電台第二台 全新節目《音樂說》主持王耀祖 Joe Wong今晚請嚟 #鍾舒漫 作客，以自選歌曲回望出道至今，如何從跌跌撞撞中成長嘅經歷。
由小到大，不論係媽媽喜歡嘅徐小鳳，抑或係Sherman自費買第一隻碟嘅歌手鄭秀文，Sherman嘅成長都離不開廣東歌。直至15歲開始跳舞，令佢認識到黑人音樂，當中最受啟發莫過於Usher嘅《U Remind Me》︰「好吸引我，令我好想跟住郁，我好感受到自己。」
Sherman從細個比較怕醜、唔想畀人知自己喜歡唱歌，而到下定決心參加歌唱比賽，原來全因頂唔順自己？「我太鍾意唱歌，開始作好多歌、錄音、儲喺電腦，但做咁多之後，我就諗咁又點？點解我唔好好面對自己鍾意嘅嘢？所以參加比賽只係諗住練膽，想試吓喺評判面前唱歌。」
出道之後，Sherman發現自己唔識處理來自群眾嘅壓力，就算打扮得再靚都缺乏自信︰「我到而家都記得，一次球場活動嘅後台，我一個人坐咗喺度，其他人喺度傾偈，我唔係唔想同人講嘢，但我覺得好odd（奇怪），唔知點做好。」直至第二首作品《#好好擁抱》唱到街知巷聞，愈嚟愈多人認識自己之後，亦為佢帶嚟自信。
過去兩三年，Sherman面對聲帶嘅困擾，直言摧毀佢嘅自信、自我形象，令佢一度希望逃離呢個世界︰「其實14、15年已經開始有問題，但我冇發覺，到17年唱live好唔穩定我先知，不停犯低級錯誤。」Sherman訪尋過中醫、西醫、唱歌導師等，嘗試搵出問題，漸漸先發現原來一直以嚟累積太多壓力，又唔識得紓解，到而家因為學識改變自己想法，先可以逐步走出困境。
今明兩晚（11月16日、17日），香港電台第二台 RTHK Radio 2《音樂說》，有鍾舒漫以音樂說故事。
====================
#港台第二台《#音樂說》──「說故事」，逢星期一至五深夜12am – 1am由 #王耀祖 主持；#梁德輝（逢星期一、二）及 #林蕙（逢星期三至五）緊接深夜1am – 2am為大家「說音樂」。
rthk.hk/radio/radio2/programme/letthemusicspeak
