【官宣】軒達臣成阿積士史上最高薪球員

荷蘭傳統班霸阿積士周四(18日)宣布，成功簽入英格蘭中場佐敦軒達臣，雙方簽約2年半，呢位33歲中場將會着6號波衫。據荷蘭傳媒報道，佐敦軒達臣將成為阿積士史上最高薪球員，教練雲斯捷亦指佢係阿積士重要收購。

佐敦軒達臣同伊蒂法克傾掂解約後，結束半年嘅沙特聯賽生涯，重返歐洲加盟阿積士。雲斯捷喺簽約儀式後表示：「我哋需要一個有經驗、有領導能力同即時帶嚟改變嘅球員，佐敦軒達臣就係呢種球員，佢嘅加盟令球隊實力大大增強，無論場內場外都會對年輕球員有積極作用，我好開心佢成為阿積士一員。」

佐敦軒達臣放棄沙特嘅天價人工，不過阿積士為簽佢都大破慳囊，甚至不惜打破薪酬架構，令佢成為阿積士史上最高薪球員。荷蘭著名記者雲達卡恩爆料：「阿積士嘅薪酬上限係500萬鎊(約5,000萬港元)年薪，之後從來未被打破，但考慮到今季嘅困境，佢哋決定用史上最高薪去促成轉會。」阿積士原本最高薪球員係貝雲積，佢嘅年薪為390萬鎊。