Dough-Boy，香港音樂總監兼 Rapper，年僅 26 歲，但跟他合作過的藝人眾多，包括：鄭秀文、側田、MC Jin 等等。2014 年更加憑《狂舞派》主題曲而成為第 33 屆香港電影金像獎最佳原創電影歌曲得主。除了音樂監制的發展外，他今年亦將以饒舌歌手身份推出個人專輯，前幾日就率先推出了新歌 “You Think I’m Playing” 的 MV，今日籮文就走訪 Dough-Boy 的工作室，跟他聊聊天。
Dough-Boy 點解叫 Dough-Boy?
字面意思上，Dough 即是「麵團」，如果你上 Google 搜尋 Dough-Boy，搜尋結果出黎第一張圖片會係一隻同樣叫做 Dough Boy 嘅一隻肥騰騰麵粉人，原來 Dough-Boy 喺加拿大長大，當時好喜歡食依隻麵粉人所「代言」的蛋糕，喺新加坡讀中學時，開始接觸 Rap 及音樂制作，就以 Dough-Boy 作為藝名。其後回流香港一邊修讀演藝學院的電影課程，一邊進行大大小小的音樂制作，畢業後就進入恭碩良的錄音室工作。
從未接受過正統的音樂訓練，但經過多年自學和修練，Dough-Boy 已經為眾多歌手做過音樂制作，包括鄭秀文、側田、MC Jin 等等，更於 2014 年憑《狂舞派》主題曲而成為第 33 屆香港電影金像獎最佳原創電影歌曲得主。除咗幕後制作，Dough-Boy 近年都以饒舌歌手身份出歌，今年仲計劃推出個人專輯！
▲Dough-Boy 雖然唔算係香港土生土長，但係佢啲廣東話同我哋冇乜分別。
▲咪睇 Dough-Boy 好似四眼雞丁，其實依隻先係正宗 Dough Boy。
金像獎得主 Studio 都唔係特別貴
今次走訪 Dough-Boy 個 Studio，最令我驚喜嘅係佢嘅器材，原來金像獎得主製作音樂嘅器材唔使十萬百萬，甚至有部份器材同籮文屋企嘅係同型號，Dough-Boy 嘅電腦用上 Macbook Pro，就算行行下街有靈感都可以即時紀錄。要將電腦嘅音訊輸出到喇叭，又或者將 Mic 嘅聲音輸入到電腦，就需要 USB Audio Interface，Dough-Boy 同籮文都係用上 Focusrite Scarlett 2i2，因為制作電子音樂對 Analog Input 嘅需求比較少，2 個 input 已經非常足夠。
▲Dough-Boy 無論作曲編曲作詞，甚至 Rap 都有一手。相中紅色嗰舊就係 Focusrite Scarlett 2i2 啦
Midi Controller 電子音樂制作必備
而制作電子音樂最緊要係要有 Midi Controller，當然佢都唔例外，Studio 入面有部 Novation 嘅 Launchkey 49，同 Live 嘅鋼琴演奏唔同，音樂制作唔需要 88 個琴鍵，Launchkey 49 只有 49 個，香港寸金尺土，慳位都係一個好緊要嘅一環。除咗 Keyboard，仲有一部 Akai MPD 24，MPD 係一部 Pad Controller，以一格格正方形嘅按鍵代替琴鍵，手感較硬淨，最適合用作制作歌曲中嘅鼓聲。
▲音樂制作唔需要 88 個琴鍵，Launchkey 49 只有 49 個，香港寸金尺土，慳位都係一個好緊要嘅一環。
▲MPD 係一部 Pad Controller，以一格格正方形嘅按鍵代替琴鍵，手感較硬淨，最適合用作制作歌曲中嘅鼓聲。
Plug-in 比硬件更加重要
玩電子音樂，硬件唔需要好貴，反而軟件就更加緊要。業界中好多人認為 ProTools 只係用黎錄音，但係 Dough-Boy 由編曲到錄音，整個音樂制作都係用 ProTools，佢就話「ProTools 只係用黎錄音」只係一個謬誤，其實只要配合適當嘅 Plug-in，ProTools 都可以用作編曲 。Dough-Boy 最常用到嘅 Plug-in 係 Massive，Massive 係一個 Synthesizer （合成器），透過設定，可以制作出不同電子樂器的聲音，而 Waves 嘅 「H-Comp」同「The Glue」亦經常被 Dough-Boy 用作調較鼓聲。除咗合成器及鼓聲，Dough-Boy 會用到 CLA Vocals 去壓縮及調較佢自己把聲嘅 EQ。
▲Dough-Boy 由編曲到錄音，整個音樂制作都係用 ProTools 10。但籮文問佢點解唔 Upgrade 到 12 呢，原來兩個版本 Build-in 嘅 Plug-in 同樂器都有唔同，佢就安於用 ProTools 10。
越洋合作編曲 點做到？
啱啱出咗嘅新歌，編曲除咗 Dough-Boy，仲有年輕音樂人 Silverstrike 合作，不過 Silverstrike 原來身處加拿大，究竟佢地係點樣越洋合作編曲呢？原來佢哋透過 Email 黎傳送聲音（估唔到咁簡單呢！），最後就由 Dough-Boy 進行 Mixing，完成最後「封頂」儀式。咪睇兩位音樂人玩嘅音樂類型差不多，原來佢哋用嘅軟件同硬件都有大不同，Dough-Boy 就用 Mac 同 ProTools 嘅同時，Silverstrike 就係用 Windows 同埋 FL Studio 軟件。
▲依首歌嘅編曲除咗 Dough-Boy，仲有年輕音樂人Silverstrike 合作
新歌編曲及 MV 都富有香港本土特色
講完佢嘅 Studio 同技術幾勁，就梗係要聽下佢啲歌啦！ 2014 年獲得金像獎後，某人有見及此就自薦成為佢嘅經理人，希望從中獲利。但係依位所謂經理人編造一份既不平等的合約以騙取 Dough-Boy 的金錢。汲取教訓後，為咗抒發心中不忿，就寫咗依首 “You Think I’m Playing” 鬧爆依位所謂經理人。
在香港音樂界都知 Dough-Boy 作曲編曲都有一手，但係今次為咗豐富整首歌嘅氣氛，特意搵埋一個 21 歲嘅音樂制作人Silverstrike 合作。Silverstrike 擅長制作 Dubstep 風格音樂，配合 Dough-Boy 嘅 Hip Hop 節奏，就成為依首聽落極具侵略性又搶耳的 EDM x Hip Hop 作品。Dough-Boy 希望令編曲更有香港特色，但加入中國樂器好容易令感覺變得老套，佢喺旋律及其他地方上做手腳，令依首歌聽落都有香港嘅感覺。
如果你有睇，可以見到依個 MV 係勁有香港特色，當中有幾段都取景於珍寶海鮮舫，係拍攝團隊特地租了一艘舢板到海上攝製，加上 MV 中有廣東人飲茶嘅茶壺、萬壽無疆碗等等，全部都係香港人經常見到嘅物件，但係加上剪接及視覺效果嘅配合，觀眾一定 Feel 到 Dough-Boy 想釋出嘅怒火。見到個 MV 咁靚，原來 Dough-Boy 都有份剪接架，剪接部份佢同好多人一樣都係用 Adobe Premiere Pro，一條影片要夠靚，畫面調色都好緊要，佢地就用到 Da Vinci 調色軟件去做。
後記：香港音樂已死？原來最緊要做返自己
Dough-Boy 覺得音樂於市場上已經變成整個配套的一小部份，要讓多啲人接觸到自己嘅音樂，除咗音樂要做得好，視覺上都要花啲心思。問到 MV 嘅設計概念，佢眼見好多華人 Rapper 不論 MV 或衣著風格，甚至行為作風都模仿黑人 Rapper。反觀其他亞洲地區，尤其是韓國，佢哋嘅 Hip Hop 音樂流行程度比香港高，Dough-Boy 就認為原因係佢地冇盲目去模仿黑人，反而將屬於黑人的音樂改造成有自己特色的 Hip Hop，所以 「You Think I’m Playing」 嘅 MV 就以香港特色的畫面作為主線。
分享到 :
最新影片
