海底零碎 一些將會結集成書的文章 由不知天高地厚，一切都正在學習的小伙子寫的 他愛文字，因為文字能捕捉時光，捕捉將被遺忘的記憶 和永不被丟棄的感覺 一直溫存

486愛的鼓勵 0訂閱站台

以前我無諗過呢個問題：讀書到底為乜？因為以前真係鍾意讀書，真係鍾意學習，每次上堂都覺得好興奮，期待今日可以認識呢個世界多一d。當然，而家既我都無諗，因為唔敢去諗。原來講穿左，讀書只係一種工具，去爭取攞高薪厚職既入場卷，溫習只係達到目的既手段。讀書，原來為左贏。原來做好多大眾所謂有價值既野，都係為左贏。呢個世界好像發左神經咁，連明明唔需要分勝負，甚至無勝負既野，都要夾硬定個標淮，去製造失敗者。

所以，我唔覺得成績好，係呢個範疇到成功，就係一切，我亦唔覺得呢個係好光彩既事。因為將人化成數字去睇，去量化成統一個價值，係現代社會最荒謬既事，忽略左真正既人，有感情、有個性、有心地、有誠信、有態度……

係有幾時開始？應該係由呢個所謂教育制度開始，人人都讀讀讀，讀到成績就係權威，忽略哂十幾歲應有既可能性，高考做超過一百題文化，就係為左個半鐘既三揀二，讀書唔係讀書，係學考試技巧，答題方法。全世界好似係淨番一條路咁，唔行d人就會毫不猶疑咁踩過你，仲要以為自己好強。你會變成一舊阻住哂既野，因為你呢方面做得唔好，人地根本不屑去理會你，當然有一小撮人會在意，佢地會覺得你消失仲好，唔便阻住佢地既地球轉。

到底係個制度令到d人變成咁，定係大部份人根本係咁。原來，認識得呢個世界多d，只會對呢個世界越失望，因為現實世界係殘酷既。一直以來學到既一套堅持原則，或者係世界應該係點，要做好人，原來可能只係成人既謊言…

完美之所以唔存在，因為美麗根本係一個呃細路既卑鄙大話，我地一直都被騙，被逼做d我地唔想做既野，然後到某一日，識得去咁樣呃人地，去掩飾自己，放暗箭，不斷向上爬，扮睇唔到需要幫助既人，扮睇唔到要重視既人、感情，達到標準上成功既定義。咁就係成長左，大個左，然後呢？去到最高位，然後呢？去操縱社會，去定立畸型既制度，令全世界都好似自己咁失衡咁慘淡。原來，世界既運作係一套惡性循環，已經無得救

單純到用成績去衡量、量化人既價值，我真係頂唔順勒~但我已經走唔甩呢個制度，因為周圍、社會、甚至世界既運作模式都係咁。我一係死左佢，如果唔係就一定要接受。社會多左年青人自殺，可能唔係因為佢地意志力薄弱，而係因為佢地係正常人，但偏偏要接受呢個畸型既制度，並且無可避免地要變成畸型既人，因為咁先有機會繼續生存，如果唔係就係永遠既失敗者，永遠受到輕視和不屑…

點解由人建立、組成既社會，一d都唔人性化？點解現實利益遠比人重要？我唔係唔明，只不過接受唔到，我只係想做關於人、關於愛、關於建立內在既事。如果要做個叻人，我寧願做好人，即使偶爾會俾人搵笨，但係比為左安全感而跟住呢個世界畸型好太多。