廚師，從來不只是男人天下，○五年出任City'super旗下superlife culture club行政總廚的張倩敏（Charmaine），更視廚房如舞台，一一年不但於無綫收費電視台主持美食節目《新派煮意》，更吸引張曼玉、劉嘉玲、梁朝偉等紅星做其廚房的座上客，奠定其「星級教煮」地位。

貴為總廚，定必四處拜師學藝，不過訪問當日一邊烹調美食，一邊跟我聊天的張倩敏笑言，她的「師父」全在她家中：「我嘅大師全部都喺我屋企嘅書同電視入面，屋企有成過千本（烹飪）書，我自細已經會攞嚟自學，仲曾經因為睇張曼玉同張耀揚套電影《白玫瑰》，學識點整豬扒飯添，哈哈，好自然就學識咗，無得走雞o架喇，我注定做呢一行！」

煮食靠天分，面對張倩敏精心炮製的美食，不多說，開餐先！

想一嘗大廚張倩敏的廚藝，客人要提早一個月前訂位，每位盛惠一千二百元。

父母斷聯兩年

一把刀，一個鑊，再加幾隻碟，張倩敏兩三下手勢，已經煮好幾碟小菜，未吃已經叫人垂涎欲滴，入口後更是回味無窮。「我真係好鍾意煮嘢食，細個已經會同媽咪一齊整臘肉，仲會食海膽、臘腸同大閘蟹，你話邊度有一個小朋友好似我咁癲？」

蓄短髮的她，穿上廚師服，站在煮食枱前，動作純熟俐落，完全展現出主廚的架勢。六歲已離鄉別井到美國讀書的她，從小廚藝已獲同學青睞，簡單整一件三文治，更引來同學間搶食熱潮。「我細細個已經去咗L.A.讀書，嗰時學校啲嘢難食到離晒譜。我忍唔住要自己整三文治返學校食，一到食飯時間，即刻畀啲同學仔搶晒，個個都話好食。第二日我再包多三件，又畀人搶晒嚟食，我就同佢哋講，如果想食嘅話，就要畀錢我去買材料，二、三年級我已賣三文治，一蚊（美金）一份， 後來仲加價賣到個半（美金）一份。」

大學修讀政治系的她，畢業後懶理父母反對，偷偷到餐廳做免費學徒，結果激得父母兩年沒跟她來往。「我都有做過其他工，試過喺美國超級市場負責做pack袋，諗住對住啲食物實好開心，點知搬啲西瓜同可樂都搬到死；之後去過做production，又去過做茄喱啡拍廣告，但只係負責幫人燙衫，悶到癡線，於是我就同自己講，唔可以再咁落去。

「我決定瞞住屋企人，去咗間餐廳做（廚師），仲係唔收錢嗰隻，做倒垃圾同執頭執尾，後來畀父母知道咗，嬲到佢哋死，直情無睬我兩年，但其實咁仲好，唔好理我，可以畀我專心做廚師！ 」

張倩敏的魅力，就連劉嘉玲和梁朝偉都曾是其座上客：「劉嘉玲無跟我學整嘢食，佢負責食嘢就得o架喇！」

俞琤起身走佬

初出茅廬經驗欠奉，但張倩敏回港後卻膽粗粗到半島酒店見工，誰知一擊即中。「當初我去見日本餐（做廚師） ，佢從來未試過請女人，（面試時）有二十個男人眼定定咁望住我，嗰啲男人嘅眼神就好似話我：『你唔好玩啦！』 我心諗，哼！我就見成份工畀你哋睇，我帶咗之前影低整嘢食嘅portfolio去，點知真係請咗我，開心到成晚瞓唔着！」

於半島做了九個月，已嘗到做廚師辛酸，「一開頭做，咩都唔識，日日做成十四至十六個鐘，整成一、二百隻蝦（天婦羅），煮到成隻手爛晒，因為唔識落油，彈到成隻手都係，包住隻手都要繼續做；而且個鑊好鬼重，擺埋啲食物簡直重到不得了！但又唔可以成日靠師兄幫你攞，真係好攰。不過講到尾，做廚師唔係靠勞力，而係要靠腦，創造菜式。」

辭掉半島工作後，張倩敏轉到天后一間日本餐廳做主廚，〇五年更出任City'super旗下superlife culture club的行政總廚，負責設計菜式。她笑言，做總廚壓力好大，尤其對住小朋友。

「做大廚一定有壓力， 因為食嘢係最無得呃人，如果有小朋友坐喺度食飯， 我真係會滴汗，因為佢地鍾意就鍾意，唔鍾意就唔鍾意，唔鍾意嘅話，可以直情坐喺度望住嚿嘢咩都唔食，所以我成日會去其他國家增值自己，去過深圳學整水煮魚，又寫過email去外國餐廳學藝，之前仲去咗西班牙做交流。」

打滾廚壇逾十五年，經驗已相當老到，但仍然有失手的時候，憶起蝦碌往事，張倩敏都忍不住大笑。「已經係九年前嘅事，嗰時我仲好green，啱啱喺度（City'super）做無耐。有一次俞琤要嚟食嘢，每位收費三千蚊，我好緊張，唔知煮咩好。知道佢哋鍾意食和牛，於是我碟碟都整和牛畀佢哋食，膩到佢哋起身走佬 。搞到我好sad，唔開心咗好多晚，覺得自己好差，又係咁亂諗嘢，擔心佢會唔會同人講我煮得差呢？八年後，畀我撞番佢，哈，呢次佢食晒我煮嘅嘢，仲話好味添！o依家諗番起，都覺得好好笑！」

她與同樣熱愛烹飪的「Ball后」薛芷倫老友鬼鬼，去年年尾更親自炮製美食給薛芷倫，為她慶祝生日。

會親自挑選食材的她直言有個遠大抱負：「中國好多偏遠學校嘅食堂都欠缺衞生，我想去教佢哋點樣處理食物，傳授知識畀佢哋，希望啲小朋友會食得健康。」