一直以嚟，廣東話作為香港人嘅母語，由市民日常生活到各正式場合，都係香港人使用嘅主要語言。而我哋香港中文大學長久以嚟絕大部份課程都係用廣東話嚟授課，直到劉遵義前任校長強硬推行國際化呢樣嘢之後，唔理一眾師生嘅反對同不滿，將部分課程教學語言改做英文。雖然係咁，今日仍然有大部份嘅課程係沿用廣東話作為授課語言，因為廣東話喺我哋香港人嘅母語，用嚟教書，會幫到同學學習，事半功倍。再講，廣東話有九聲，講嘢嗰陣有明顯嘅抑揚頓挫，令到感情更加突出，聽嘅人更加容易咁理解同埋體會；而廣東話嘅用語生動同活潑，令到話語會更加傳神，令到語言更加有生命力。

但係喺今日大學莊嚴嘅畢業典禮上面，沈祖堯校長竟然背棄我哋香港人嘅母語、我校教學嘅主要語言，先用普通話致詞，之後先用返廣東話致詞，令到同學大感震驚同埋憤怒，不禁疑惑，今日究竟係香港中文大學嘅畢業典禮，定係深圳中文大學嘅畢業典禮？

沈校長今日先用普通話為畢業典禮致詞，除左向中共政權獻媚，表達政治效忠之外，實在無其他嘅理由做呢樣驚人嘅舉動。月前沈校長先至訓示過我哋學生，百萬大道喺一個莊嚴嘅地方，大學畢業典禮作為一個神聖嘅場合，同學應該係俾返充分嘅尊重。如今，喺校徽下面，喺畢業典禮上面，喺眾師生面前，喺致詞嘅時候，利用呢個機會，行呢個獻媚之舉，表達您嘅政治效忠，侮辱咗神聖嘅畢業典禮，實在可恥。喺呢到學生敢問校長一句，唔尊重呢個莊嚴之地，唔尊重畢業典禮呢個神聖場合，喺同學，定喺沈校長您？

對於中大人嚟講，沈校長您嘅態度，唔只有欠讀書人應有嘅禮貌，身為文人學者，身為一大學之長，風骨蕩然無存，實在有負同學嘅期望，有負大學嘅期望，有負社會嘅期望！引述沈校長您嘅說話，面對中大嘅校訓「博文約禮」，您情何以堪？

今日沈校長用普通話致詞之舉，實在係傷害咗中大人嘅感情，學生我等希望您反思作為大學校長身分嘅一言同埋一行，為我等愛護嘅中文大學，慎言慎行。

崇基學院學生會

新亞書院學生會

聯合書院學生會

逸夫書院學生會

和聲書院學生會

香港中文大學教務會學生成員(社會科學院)孔浩名

二零一六年十一月十七日