// 以 前 鄉 下 唔 係 咁 方 便 買 咩 靚 嘢 ⻝
亦 唔 係 隨 時 有 得 ⻝
好 似 蘿 蔔 啱 啱 種 出 嚟 、收 成 喇
隔 離 叔 婆 或 者 阿 嬸 呀 嗰 啲
就 會 話「 哎 呀 有 蘿 蔔 喇 」
咁 我 哋 跟 住 整 蘿 蔔 茶 粿 ⻝ 囉
或 者 有 時 啱 啱 見 到 落 大 雨 、去 唔 到 田
咁 就 做 啲 茶 粿 ⻝ 囉 // — 黃 群 英
⨀ 工作坊由村民黃群英主持
⨀ 客家茶粿特色、材料與做法
⨀ 學習茶粿以外,更可到帖文下方,從訪問了解更多有關黃群英的生活與逸事
░ 樂 ◁▶︎ 在 家 村 樂 節
░ 英 ◁▶︎ 黃 群 英
樂 ➫ 群英姐,你以前細個係咪成日整茶粿㗎?
英 ➫ 嗱,以前喺荔枝窩,我好細啦,又冇話賣嘅。不過一年都有幾次做嘅,我阿媽都有做嘅。好多嘢都係有心想學就會識啲嘅。細細個都係睇隔離叔婆呀、阿嫂嗰啲做嘅,初初都做得好差嘅,又唔識較粉呀,個粉唔balance,咁我睇吓睇吓,就越學越叻囉,哈哈哈!
樂 ➫ 通常係乜嘢時候會食茶粿㗎?
英 ➫ 睇時節啦,好似蘿蔔啱啱種出嚟、收成喇,隔離叔婆呀、或者阿嬸呀嗰啲,就會「哎呀,有蘿蔔喇」,咁我哋跟住整蘿蔔茶粿⻝囉。或者有時啱啱見到落大雨,去唔到田,咁就做啲茶粿⻝囉。客家人做蘿蔔茶粿呢,有乜嘢節就做乜嘢茶粿,有分嘅。清明做黑色嗰啲雞屎藤,要拜神呀咪做啲紅茶粿,紅色嗰啲拜神嘛。鄉下係一個節、一個節咁做嘢㗎,唔係隨時有得⻝。真係好特別㗎。
樂 ➫ 你通常會落啲咩餡料?
英 ➫ 以前鄉下,你唔係咁方便買咩靚嘢⻝。咩鮑魚呀呢嗰啲根本就冇可能,咁呀臘腸呢啲間中都有嘅,過年呀都有買臘腸嗰啲嘅。蝦米肯定有㗎喇。放啲蝦、放啲蔥啦,咁就香啲囉。
樂 ➫ 你喺六十年代離開荔枝窩去英國生活,會唔會做茶粿食?
英 ➫ 英國無人⻝呢啲嘢,嗰時都冇做過茶粿。我66年去,去咗幾廿年,煮雜碎,做外賣檔呀,做餐館咁啦。細細過去係同人打工嘅之嘛,菜都無⻝過。⻝椰菜呀、⻝⻘椒呀、蘑菇嗰啲囉。咩叫菜心?都無見過!而家咩都有得⻝,以前唔係㗎。以前英國好興⻝薯仔條呀、雞脾呀、炸魚薯條呀、腸仔呀,我咪⻝嗰啲囉。而家我聽報紙話賣好貴喎,二十磅一份,為起成二百蚊喎。一嚿魚同幾條薯仔咋喎!
樂 ➫ 以前呢?
英 ➫ 做過有啲舖頭,no chips、齋 fish,十八個p(按:penny,便士,百分之一磅)。最初嗰時五個p,一份薯仔,而家磅幾銀喎。你話幾多倍吖?以前好普通,求其嗰啲阿婆呀、細佬呀,行過去買份薯仔,用報紙嚟包㗎喎。冇嘢裝住㗎喎。放啲鹽同醋,就係咁捧住隨行隨食。而家英鎊算衰啦,都兑十啦。嗰時找七個幾呀,八蚊都冇。
樂 ➫ 如果搵你學整茶粿得唔得㗎?
英 ➫ 無話請教啦,大家畀面啦。想學咪搵幾個朋友嚟我哋屋企囉,約個時間咁囉,但係要收錢㗎。我好老實㗎!