香港婚後事｜女神收割機羅天宇剖白急生仔 陳自瑤認保守拒信夜場有真愛

陳自瑤（Yoyo）、賴慰玲（Winki）、黎諾懿及羅天宇主持嘅清談節目《香港婚後事》嚟到第6集，繼續喺相愛28年嘅單立文（豹哥）同胡蓓蔚（豹嫂）夫妻分享。

今集嘉賓繼續係豹哥、豹嫂。

承接上集，豹哥追擊「單身貴族」羅天宇對婚姻有冇憧憬，天宇坦言：「拍拖一定係向住結婚方向，但係慢慢落去好似唔係好順利，或者覺得去唔到嗰度（結婚）嘅，之後會再睇定啲先，但依家開始年紀大、想有小朋友嘅話，又好似有少少趕。」豹哥以過來人身份教路：「千祈唔可以急，我差唔多50歲先結婚，慢慢揀，先揀到一個真係好嘅。」豹嫂聞言插嘴話：「咁我哋決定唔生小朋友嘛，如果佢係想生…」鬼馬嘅豹哥即搞笑話：「吓？你唔生小朋友㗎？」場面搞笑。

天宇話自己年紀開始大，心急結婚生仔，豹哥話唔好急，最緊要揀到個啱。

今集分享嘅真實故事花生指數十足，Winki話有一對三十幾歲嘅夫婦，結婚多年感情穩定。兩人婚後喺家中不時聽到隔籬屋「翻雲覆雨」嘅聲音，屋主係一名60幾歲嘅油膩大叔。豹哥聽畢後即婚姻專家上身並分析：「婚姻耐咗，你會受到啲莫名其妙嘅引誘，之後你會好好奇，好奇就害死貓，好奇心係人類天生本性，婚姻係要有忍耐力，忍耐力就係要戰勝你嘅好奇心，你先維繫到婚姻。」

賴慰玲今集分享了一個驚爆的真實故事。

Yoyo就問豹哥、豹嫂有冇一刻曾經諗過會出軌？豹哥Man爆話：「如果你（結婚時）立咗誓，同佢（另一半）講過我愛你一生一世，如果你做唔到嘅話，你根本就唔係男人，係咪呀？」Yoyo再講到有人專揀「有婦之夫或有夫之婦」埋手，想知豹哥有咩獨特見解？就要留意節目。最後豹哥拿出結他伴奏，豹嫂大獻歌喉唱出《傾城》，為營火會畫上圓滿句號。

豹哥婚姻專家上身侃侃而，Yoyo 提到有人專揀「有婦之夫／有夫之婦」埋手。

之後4位主持齊齊蒲吧Happy Hour，大談昔日蒲吧史，Yoyo自揭蒲吧次數不多：「同朋友去過幾次，我仲會去跳舞添。」諾懿追問有否艷遇時，Yoyo話：「有嘅，會有人行埋嚟話：『你好靚喎。』但係我冇Show佢。」Yoyo自認傳統，覺得若果一個人可以喺酒吧撩女仔，即係慣犯。講到酒後做錯事，諾懿笑言認識太太李潔瑩的第二天已經大醉，所以太太早已見盡佢嘅醜態，仲自爆有次喺好友陳敏之生日飯局飲到勁醉，結果李潔瑩做咗個窩心行為，令同場嘅伍詠薇激讚。

Yoyo 自爆冇乜蒲過吧，同埋自認傳統唔相信酒吧有真愛，而諾懿話認識老婆第二日已經醉到爆，所以老婆一早已經見盡佢嘅醜態。

《香港婚後事》逢周四及周五晚十點半翡翠台播映