貝理雅

貝理雅（英文：Tony Blair，1953年5月6號—）係第51任英國首相、第一財政大臣、公務員事務部部長、工黨黨魁兼英倫東北部實治菲爾德選區（英文：Sedgefield (UK Parliament constituency)）下議院議員。而作為英國內閣嘅閣臣，亦係樞密院顧問官。

貝理雅喺1994年7月起做工黨黨魁。佢做黨魁嗰陣，工黨放棄咗十幾年前訂下嘅政策目標，重新定位，結果喺1997年嘅大選勁贏，踢走執政18年嘅保守黨，嗰次亦係保守黨自1832年以嚟輸得最慘嘅一次大選。貝理雅係工黨史上任期最長嘅英國首相，亦係唯一令工黨連贏三次嘅工黨黨魁，佢響2007年5月10號宣佈會喺同年嘅6月27號唔做，由白高敦接手。