喺我人生裡面,除咗太太,劍擊可以話係我碰上後,就冇放過手嘅嘢。 我喺大學讀緊書嘅時候,都係一路打校隊,到第四年,仲做埋隊長添。畢業之後,就應母校 MIT 體育部嘅邀請,擔任劍擊隊助理教練。由嗰一刻開始,我就冇再參加任何劍擊公開比賽,因為我覺得唔應該混淆教練同運動員嘅角色。 我呢個退下火線多年嘅劍手,上個禮拜就去咗香港公園體育館,參觀一連兩日嘅「港九區中學校際劍擊比賽」。今年我母校喇沙嘅總成績雖然可以保住第二,但個別成績就一般,有好多可以改善嘅地方,希望師弟佢哋明年成績會更好。 我喺八十年代返香港之後,就開始返母校教劍,當時香港嘅劍擊校際比賽,就只有男子花劍一個項目,所有賽事唔駛兩個鐘就打晒。時至今時,劍種已增加至花劍、重劍同佩劍嘅男女子六個項目,有團體亦有個人比賽,加上參加比賽嘅人數實在增加咗好多。我諗大會為咗想喺兩日之内完成晒所有賽事,唔單止喺場內設立20條劍道,大會仲相應減少同學參加比賽嘅選拔回合,以加快比賽嘅進程。 我個人覺得咁嘅安排唔係咁理想,到底我哋係想同學有多啲參與比賽嘅經驗同體會,定係喺最短時間內比出冠亞季軍就算?呢個值得大家去思考。 點解今年多咗咁多人參加比賽?我相信,張家朗兩年前喺東京奧運攞到金牌,肯定產生咗好大嘅推動力,令到好多同學覺得打劍好型,好好玩。近年唔少劍擊運動員喺退役之後,都出嚟教授劍擊或者設立學校,令呢項運動普及咗好多,呢個都係好事嚟嘅。 我知道有啲家長為咗整靚啲仔女嘅 CV,增加佢哋入到一啲好學校嘅機會,所以細細個就比啲仔女去學劍,有啲細到仲讀緊幼稚園就話去打劍,咁樣未必可以令子女成為下一個張家朗或者江旻憓,但可能好快就令小朋友有「劍擊疲勞」,唔願意堅持落去,或者冇辦法打到好成績,呢個未必係大家希望見到嘅。 不過點都好,多運動有益身心,所以呢個禮拜,我都以「健康榮譽大使」身份參加咗「世界心臟日」嘅心臟健康嘉年華,同家燕媽媽等朋友一齊推廣要多運動,注意心臟健康。 打從 2009 年做完通波仔手術以嚟,我自問係一個好聽話嘅病人,除咗按時食藥,食得清淡,常做運動,保持心境平靜,練到睇新聞都唔會發忟憎,(其實,我係少咗睇新聞),仲定時定候去見下醫生,真係錫住個心。 我仲趁有時間睇咗由賴恩慈導演同編劇嘅《4拍4家族》,唔錯㗎,主題係講去或留嘅故事,好現實,仲提到要忘記,當中嘅意義,就由觀眾自己去體會同發掘,港產片仍然需要大家嘅支持! #長情第一對太太 #劍擊 #世界心臟日 #4拍4家族