三十而真.升呢 羅仲謙
孔子說的「三十而立」,大概就是指,人踏入三字頭的年紀,(照計)已有能力承擔自己的責任,並且(應該)已在個人的各方面,都有明確方向。
付諸於羅仲謙身上,這話倒是冇花冇假,連括號內的字也可以慳番。
數年前我跟他做訪問,仍是二字頭的他,sell靚仔、賣巨胸,是很多後生仔女劇集和電影的搶手演員;外界最關注他的,不是他有否真的對前女友傅穎動粗,就是他跟楊怡是否在車廂中食「雲吞麵」。
今天眼前的他,即使足足瘦了兩個碼,即使說話時仍會笑得傻更更,但予人感覺卻踏實多了,工作上已經拍着郭富城、小瀋陽和馮紹鋒,成為賀歲片《西遊記之孫悟空三打白骨精》裏的四師徒,正式踏入內地市場;感情上,他亦已經常被追問何時跟楊怡拉埋天窗。
「唔係講笑,我入咗行十一年,真係到我廿九、三十歲嘅時候,先開始搵到自己嘅方向,感覺上先開始覺得穩定囉。」
頓了頓,他忽然醒起,有感而發。「係喎,我未夠廿歲就入行,原來我今年八月,就已經三十二歲啦!真係不知不覺呀!」接着再望着我說:「你都算睇住我大o架喎!哈哈哈!」
羅仲謙!!!!
沙僧
查實,羅仲謙早在一三年《西遊記之大鬧天宮》已有份演出,那次他飾演「木吒」,不算起眼,也沒有令觀眾留下太深印象;然而這回《西遊記之孫悟空三打白骨精》,他卻已經升呢,成為四師徒中的「沙僧」了。
升呢呀?又唔可以咁講嘅,我只可以話多謝導演(鄭保瑞)搵我做「沙僧」。其實最初我都好愕然佢搵我做呢個角色,「沙憎」不嬲都係肥肥哋,係麥包(麥長青)呀、徐錦江嗰啲資深演員做o架嘛!而且我自己都有睇番以前啲「沙僧」係點做o架,但我發覺,原來「沙僧」喺四師徒入面,係最唔起眼嗰個,佢除咗只係個搬運工人,攞住啲行李、擔挑周圍去之外,有事又唔打得,平時又冇乜主見,好似冇乜function咁,哈哈哈!
但導演話,佢想今次嘅「沙僧」同以前畀人嘅印象好唔同,想有個新模樣:全身變咗藍色,好大隻,一行出嚟好勁揪、好打得、好英、好有霸氣!但係性格就跟番原著,比較忠心同戇直,又有少少清純,再加埋我羅仲謙少少嘅小朋友可愛性格(說時眨眨眼睛作可愛狀),即係外表好剛強,但內裏其實係個少男!哈哈哈!所以我做呢個角色冇乜壓力,因為冇得搵番之前嗰啲嚟比較,藍色又大隻嘅「沙僧」喎,我點做都得啦!