離開亞視重投無綫 陳展鵬自爆人工大縮水
陈展鹏 時都被網民笑言「亞視味濃」，雖然他曾在亞視拍過戲，但他其實都是無綫訓練班出生。煎pan逾20年的演藝生涯經歷不少波折，在外闖蕩一番後仍然決定回歸無綫，他自爆當時人工由四萬多減至一萬多，但因希望給予自己一個交代決定回巢發展。
煎pan雖然離開過無綫，但他直認「唔想離開TVB」，只是在機緣巧合下去了寶麗金唱片公司發展，可惜當時遇到金融風暴令亞洲區陷入低迷，煎pan亦感嘆當時捱得非常辛苦，「因為真係無機會，咁嗰陣時又係20幾歲，邊會諗住會輸㗎？你明唔明白？有機會嘅，係咪先？無諗住會輸㗎嘛。但實際上證明話俾你聽，係無機會，就算你幾雄心壯志都好，你無機會就係無機會。」
當時無綫曾經與煎pan溝通過，希望他回巢發展，煎pan表示其實自己渴望「返娘家」，惟未能衝破心理關口，「你要明白到當一個人，你喺一間大公司，喺TVB，你決定離開咗之後，而你無乜表現、無乜作為、你又翻返嚟TVB，你覺得好似自己原地踏步」，所以煎pan才決定到亞視發展。但因為亞視變動非常大令他難以發展，最終還是決定回巢。
剛返回無綫時，煎pan其實已在娛樂圈中打滾了有將近十年之久，「但觀眾唔係好認識你，你好想同自己有個交代，即係覺得其實做咗呢行，錢唔錢唔好諗了，已經唔係諗錢唔錢，希望嚟到一個咁大嘅舞台，得唔得就要睇你自己陳展鵬了，你要學嘅都學咗咁耐，跟住先至有勇氣返嚟TVB」，他又強調這個轉變令其人工少了三分之二，「由4萬幾蚊到到得返萬幾蚊（返嚟TVB），咁都決定要試，即係一個交代，咁好好彩，自己嘅表現，有好多監製都睇到，跟住機會一路一路咁多」。
回巢後的煎pan拍攝了不同題材的電視劇集，但煎pan覺得較能被觀眾接受的都是比較正面、正氣的角色，「其實我都好奇怪，因為我個樣，其實好多朋友講，或者我自己都覺得，我係啱一啲亦正亦邪，但唔知點解真係中嗰啲都係比較正氣啲、一啲hero啲咁嘅嘢」，不過煎pan認為這些角色不太難拿捏，只要劇本及角色賦予到立體感就會做到，「好得意，有時候你自己鍾意做嘅嘢，或者你覺得係好有誠意做嘅嘢，未必係一定出嚟口碑係好嘅」
被問到會否返內地拍戲，煎pan指雖然都有諗過，但他最希望的還是「可以做到我自己想做嘅嘢」，而TVB正正可以令他心想事成拍攝到他希望拍攝的作品，「香港得一個（主要拍劇的）電視台，咁你都要團結㗎，全部人走晒咁拍乜嘢啊？係咪啊？所以我希望都拍一啲屬於香港品味、香港節奏嘅，我哋再將個劇本再精細啲、再琢磨好啲嘅劇本出嚟。」
逾20年的演藝事業，煎pan認為自己是一個「好幸運的人」，因為這行無論台前幕後有很多有才華、有誠意的人，但未必每個人都有好的回報，但他就是一個有好的回報的人。而且因為經歷過重重波折，令他更加懂得珍惜，知道什麼才是令他有「真正的財富」，「就係30歲俾自己一個交代，人與人之間的交代，可能呢樣嘢就係我追尋嘅嘢，可能無論喺呢一行之後會遇到高高低低都好，都係因為後生呢啲經歷，令到我識調節，識得去享受，去珍惜。」
