【復活節好去處】青衣戲棚開鑼 70小食檔任你掃！

青衣戲棚開鑼啦！為慶祝真君大帝寶誕及天后誕，青衣水陸居民每年都會兩度起戲棚，除有經典粵劇上演外，更會有近70個小食攤檔。真君大帝誕由即日起至20日於青衣舉行，復活節未諗到去邊好？可以約埋朋友一齊去掃街！

青衣傳統慶祝活動

農曆三、四月分別是真君大帝寶誕及天后誕，青衣水陸居民依傳統建戲棚、邀粵劇戲團演出。真君大帝誕會於即日起至20日舉行，天后誕則由5月5日至9日舉行。青衣戲棚有粵劇表演，適合一眾愛好者到場觀賞，同場亦設有近70個小食攤檔，年輕人亦可到場感受傳統氣氛、一嘗街頭小食。

95後創全走塑攤檔

有95後年輕人趁機會創業，於17號舖位創小食攤檔「炸炸帝」，以售價35元一份台灣夜市雞腿捲及40元一份的蜜糖炸豬手作為主打，亦有售38元的菠蘿益力多沙冰的特色飲品。該店更以全「走塑」作為宣傳，指飲品用玻璃樽裝着，客人可選擇帶走重用，或是在攤檔回收退回2元。

▲ 17號鋪位小食攤檔「炸炸帝」（圖片來源：炸炸帝instagram）

芝士龍蝦 50蚊有得食

位於54號舖的小食攤檔「好寸」，售賣串燒海鮮及肉類作為主打，包括售價50元一份的芝士龍蝦、40元一份的燒扇貝及30元一份的燒汁豬頸肉。

▲ 54號鋪的小食攤檔「好寸」（圖片來源：「好寸」instagram）

打卡必備！布丁燒38元

於葵芳廣場開店的「呦呦鹿鳴の布丁燒」亦有參與今次的青衣戲棚。有茉莉花茶、伯爵茶及朱古力等口味，售價由38元起。

▲ 《呦呦鹿鳴の布丁燒》主打布打，售價38元起。（圖片來源：呦呦鹿鳴の布丁燒 Facebook）

青衣戲棚2019
日期 ：即日至20日（真君大帝誕）
5月5日至9日（天后誕）
開放時間：下午12時至凌晨1時
地點：青衣青綠街球場