蔣雅文（Mandy）和胞妹蔣雅詩（Ziya）性格各異，但姊妹情深。兩人在粉嶺公屋華明邨長大，Mandy自小負責照顧妹妹，每天接送上學，然後一起到公園玩。早前二人重回舊地，細訴兒時點滴，Mandy更自爆暗戀街市魚檔的太子爺，經常跟媽咪去買餸，就是為了見暗戀對象一面。
撰文：曹家誠
攝影：沈健程

現年37歲的蔣雅文比胞妹蔣雅詩年長九年，早年Mandy嫁到台灣，二人分隔兩地，但沖不淡姊妹情。Mandy和Ziya接受本報專訪，重踏兒時居住的華明邨，她們先到昔日經常流連的遊樂場，發現已被夷為平地，Mandy說：「以前每日接完妹妹放學就會喺呢度玩，本來有韆鞦、氹氹轉、搖搖板，仲有瀡滑梯。」兩姊妹年紀差一截，Mandy直言當時把Ziya當作玩具：「成日將佢舞嚟舞去，又揈嚟揈去，搞到佢成日受傷，我當時都好細個，唔係好識照顧人，又試過喺瀡滑梯度整親條腰。」

暗戀太子爺

直到現在，Ziya依然對Mandy言聽計從，靠的是姊妹間的信任，Ziya說：「之前一齊去東京旅行，唔知行到去邊，突然見到一條好高嘅瀡滑梯，佢叫我爬上去，但唔好瀡晒落嚟，於是我要用隻腳頂住，當時太陽好曬，條梯仲熱到辣手㖭。」

Mandy十多年前初入行時已搬離粉嶺，Ziya亦於五年前搬出舊居，小時候認識的舊商場、街市，今天面目全非，她們說：「感覺好陌生，以前嘅舖頭一間都冇晒，街市變得仲誇張，好似拍緊穿越劇咁。」Mandy更透露以前曾暗戀街市魚檔的太子爺，她說：「嗰個年代好少男仔會留長頭髮，又着住件背心喺度刮魚鱗，我覺得好有型，為咗見佢，成日陪媽咪去買餸，到今日媽咪依然以為我好鍾意食魚，但我已經唔知點樣講番個事實畀佢聽。」

每天接放學

Mandy和Ziya同讀邨內一間小學，小學依然健在，Ziya仍記得胞姊每天接她放學的情景：「每次放學一班阿爸阿媽排緊隊嘅時候，得家姐一個細路女喺度接我，然後就拖住手仔咁樣行返屋企，我哋每日嘅活動範圍就係屋企、學校、公園同街市。」屋邨已變，但不變的是她們的姊妹情，Mandy慶幸小時候的經歷：「如果再遲十年出世，我哋相處嘅時間就變咗手上拎住iPad，唔會有呢啲回憶。」

送給妹妹的禮物

Mandy五年前嫁到台灣後，與Ziya約定每年要有個姊妹旅行，她說：「結婚後，Ziya覺得我俾男人霸佔咗，以前家姐係完全屬於佢，但𠵱家要遞紙申請，所以先有呢個冇男人嘅姊妹旅行。」適逢Ziya早前生日，Mandy於是提議用文字和攝影，紀錄今次東京旅行，再集結成書，作為送給妹妹的禮物。

Mandy指於東京拍攝就如一場大冒險：「我哋事前冇定行程，每日孭住幾件衫邊行邊搵景，好似游擊隊，好狼狽好攰，影到後期已經癲癲地。」她指遊記也是二人的作品集：「我負責文字同影相，妹妹就負責形象，我寫嘅嘢好似生日卡。」Ziya笑指內容像情書：「好肉麻。」Mandy說：「我哋向來唔肉麻，仲會互寸，但心底始終有說話想同妹妹講。」