熱刺英聯盃第2圈出局　哈利卡尼走得英明

周三(30日)凌晨英聯盃第2圈爆出冷門，熱刺作客逼和富咸1比1之後，互射12碼落敗出局，剛開季已先失一盃，延續同冠軍無緣嘅宿命，難怪網民紛紛認為哈利卡尼早前離開熱刺嘅決定非常英明。

熱刺剛於英超2連勝係威係勢，但今仗英聯盃表現走晒樣，開賽19分鐘就失守，富咸中場卡亞尼禁區左路橫傳，熱刺中堅雲達雲尼情急之下擺烏龍，撞入自己龍門。

換邊之後冇耐，熱刺由巴西前鋒李察利臣頂入扳平1比1，但形勢仍然處於下風，富咸有2次入波黃金機會，包括卜比列特射門斜出，哈利威爾遜近門起腳被熱刺門將費沙科士打封出，最終打和需要互射12碼，熱刺後衞達雲臣山齊士主射宴客，富咸5射全中贏5比3晉級。

熱刺最近1次獲得正式賽事錦標已經係2008年英聯盃，此後一直同冠軍無緣，睇怕今季都好難打破宿命，早前轉投拜仁慕尼黑嘅射手哈利卡尼應該感到慶幸冇再留隊浪費光陰。