【賽後解碼】兵工廠真靈魂　奧隊創造8次機會做MVP

阿仙奴可以大勝車路士5比0，除咗兩位梅開二度球員夏維斯、賓韋特演出神勇之外，隊長馬田奧迪加特亦有好大功勞，呢位25歲挪威國腳全場創造8次入波機會，包括貢獻2次助攻，賽後力壓3位入波嘅隊友，當選為今場官方最佳球員，足以證明「奧隊」先至係兵工廠真正靈魂人物。

雖然馬田奧迪加特今場冇波入，但有多項數據屬於雙方球員之冠，包括82次觸球、8次創造入波機會、8次對抗勝出、3次成功扭過對手。賽後主帥阿迪達大讚呢位愛將：「我哋一致認同馬田係1位擁有巨大天賦嘅球員，為球隊增添特別元素，佢獲得大家喜歡同專重，憑個人領導能力及魅力，每個人都願意跟隨佢。」馬田奧迪加特今季英超已有8球進帳及8次助攻。

至於賓韋特獲球迷投票選為今場最佳球員，呢位26歲後衞表現攻守兼備，唔止射入2球，仲有3次關鍵傳波，8次對抗有6次勝出。難怪英格蘭主帥修夫基希望呢位防守大將改變主意，重新答應為國家隊比賽。