რომელ მშობელს უნდა შვილისთვის ცუდი? რა თქმა უნდა, არც ერთს, მაგრამ ჩვენდაუნებურად ის ყოველდღიური ჩვევები, რაც ცხოვრების წესია, ზოგჯერ ნელ-ნელა, მაგრამ სტაბილურად აზიანებს ბავშვის ჯანმრთელობას.
წარმოგიდგენთ ამ მავნე ჩვევებს.
- ბავშვისთვის ტკბილეულის სისტემატურად შეთავაზება. კანფეტების, ჟელიბონების, შოკოლადების ჯილდოებად, წამახალისებელ და გასახარებელ საგნებად ქცევა. ასევე ძალიან ცუდი გადაწყვეტილებაა, რომ რძის ნაწარმს ან ხილის დამტკბარსა და დაშაქრულს სთავაზობთ. რაც მეტ ტკბილს მიიღებს, მით მეტად შემცირდება ბავშვის ორგანიზმში მინერალები ნატრიუმი, კალიუმი, კალციუმი, მაგნიუმი. ეს კი ფიტავს ორგანიზმს და საერთო ჯანმრთელობის მდგომარეობას აუარესებს.
- ჯანმრთელობის განადგურების მეორე გზაა, როცა მწყურვალ ბავშვს, სუფთა წყლის ნაცვლად, ხშირად კომპოტს და წვენს სთავაზობენ. აღარაფერს ვამბობთ გაზიან სასმელებზე. წყურვილის მოკვლას ბავშვი ყოველთვის წყლით უნდა ცდილობდეს და სხვა სასმელი ამ დროს მის ჩვევებში არ უნდა არსებობდეს.
- არასაკმარისი ხილი და ბოსტნეული ბავშვის მენიუში. რა თქმა უნდა, შეგნებულად ამ საკვებზე არც ერთი მშობელი უარს არ იტყვის, ძირითადად ბავშვები ამბობენ მათზე უარს, მაგრამ ფარ-ხმალის დაყრა და ბავშვის ნებაზე დაყოლა ძალიან ცუდი გადაწყვეტილება იქნება. მიუხედავად იმისა, რომ არ უყვარს, არ უნდა შეწყვიტოთ მცდელობა, რომ ბავშვი მიაჩვიოთ ბოსტნეულსა და ხილს. სისტემატური მცდელობები აუცილებლად გამოიღებს შედეგს. მთავარია, ხელი არ ჩაიქნიოთ, „მაინც არ შეჭამს“ მიდგომა დაივიწყოთ. წინააღმდეგ შემთხვევაში, დიდი საფრთხე ექმნება კუჭ-ნაწლავს, რომელიც საკმარის ფერმენტებს ვერ იღებს. ნაწლავური პრობლემები კი ჯანმრთელობის მდგომარეობისთვის, მათ შორის იმუნიტეტისთვის, ერთ-ერთი გადამწყვეტია, რადგან სწორედ აქ უნდა მოხდეს ორგანიზმისთვის სასიცოცხლო ნივთიერებების შეთვისება.
- ცილოვანი და ჯანსაღი საკვების ნაკლებობა, როცა არ ვაკვირდებით, მაგალითად, რძის ნაწარმი ნატურალურია თუ მცენარეული ცხიმებით გამდიდრებული. შესაბამისად, შეიძლება გვეგონოს, რომ ბავშვს სასარგებლო საკვები მივეცით, სინამდვილეში კი ეს ფუჭი კალორიები იყოს. ასევე დიდი შეცდომაა ხორცის, კვერცხის, პარკოსნების შემცირება მენიუში და მათი ცომეულით ან ე.წ. სუპერმარკეტის პროდუქტებით ჩანაცვლება.