藍天白雲嘅屯門黃金海岸，有一望無際大海景真係好靚。想坐低慢慢影相chill吓，可以去新開嘅法日fusion餐廳酒吧“Hakata Concepts”。
餐廳佔地接近5000呎，鍾意食好嘢可以坐室內一嚐高級鐵板燒、手握壽司席前料理；想睇靚景就揀戶外大平台，坐喺藤波波入面飲cocktail食嘢好IGable，嚟啱時間仲可以睇埋日落𠻹。
“Hakata Concepts”唔只得靚景，更請嚟15年經驗Louis師傅主理精緻創作料理。師傅一直以傳統日本方式學師，深入鑽研壽司、刺身同鐵板燒。加上本身熱衷追求美學，所以每道料理都好唯美㗎。
【戶外單點Menu+Cocktail】坐藤波波睇海景
戶外平台可以揀單點menu同cocktail，全日任何時間嚟都得。單點menu同樣由師傅匠心製作，大玩創意將法日料理完美融合。
鍾意肉味十足嘅可揀流心芝士安格斯。外型好似壽司咁，原來係煎到焦脆嘅手打安格斯漢堡，咬開入面仲會爆出芝士㗎，再用芥末子醬代替日式醬汁，原來壽司同安格斯漢堡可以咁樣玩。
同場仲有海膽拖羅三文魚子軍艦，用紫菜包住壽司飯、海膽、拖羅等等，有啲似墨西哥taco風味。
【室內席前料理】午市·晚市CP值高
呢度午市同晚市都有套餐揀，$498起CP值好高！午市(11:30am-3:00pm)可揀刺身壽司套餐，豐富啲嘅就有壽司刺身+鐵板燒套餐，全部套餐均附熱湯、甜品。不得不提日本文化中，一間店嘅熱湯代表住師傅手藝，所以呢度既湯都落足心機自家熬製，有時會係鯛魚湯、蝦清湯等。
晚市套餐(6:00pm後)同樣有刺身壽司套餐；又或鐵板燒套餐一嚐空運海鮮鐵板燒、日本空運A5和牛等。
放心講出口味喜好 Louis師傅即席創作料理
席前料理最特別係可以同師傅交流，好似我哋食和牛時，師傅會提議揀3至4成熟最有油香。而我哋都有問返師傅，如果有人想食全熟呢？師傅就話都有方法煮到好好食，就係高溫煎兩邊迅速鎖住肉汁之餘，外層仲有種焦脆口感。如果你嚟食席前料理，不妨講出你嘅口味／唔食嘅嘢，師傅會好有心機幫你設計料理㗎。
【度身訂造Menu】真·Omakase
如果你想成個菜單都由師傅設計，可以提早致電訂枱並講低你嘅budget、口味喜好、任何食物敏感等，師傅設計好菜單後會同你確認一次，再由日本訂購新鮮食材，到時嚟到坐低等食就得喇。2至3人度身訂造餐牌大約提早3日；4人或以上想包場則建議提早一星期。
創意料理永遠都有驚喜，好似法國料理常見嘅香橙汁，師傅就再進一步用上新鮮橙汁，即場喺你面前用鮮橙榨汁，食嘅時候仲好清新香甜，唔會因為煮耐咗而澀口。有時又會加入分子料理，好似之前餐牌有嘅法國鵝肝伴蘋果泡沫醬，就將蘋果醬變成泡泡，食落好有空氣感再慢慢滲出蘋果味。
【高級料理品牌】
唔知你有無食度身訂造menu嘅經驗，但“Hakata Concepts”喺呢方面就經驗十足喇。因為“Hakata Concepts”隸屬嘅Bar With Us Group Ltd.，旗下已有9間餐廳酒吧，涵蓋日本料理、西班牙菜、西餐等，部分料理店更由日本師傅主理。
而呢間最新開業嘅“Hakata Concepts”就係品牌最fine dining嘅創意法日料理，無論品牌定師傅都極具經驗，就算素食朋友都會幫你訂購日本野菜設計料理。放心將你嘅諗法講畀佢哋聽，享受你嘅專屬晚餐啦。
Hakata Concepts
地址: 屯門青山公路1號黃金海岸商場1樓25A-C號舖
電話: 59401632
Facebook: https://shorturl.at/HQW16