謝和弦與美女「開房」　老婆晒產檢相宣布懷孕

台灣歌手「搖滾壞小子」謝和弦前晚被老婆戴怡軒（Keanna）大義滅親舉報吸食大麻而被捕，昨日獲准以3萬新台幣（約7,600港幣）保釋。此外，謝和弦被捕前於社交網上載與直播主持人莉婭（Liya）酒店「開房」jam歌嘅片段，被網民鬧爆背妻偷食。雖然負面新聞多多，但謝和弦未有影響心情，一獲保釋就走去紋身，更紋上大麻葉圖案，似乎未有「反省」，仲開直播直擊紋身過程。

未知咁啱得咁橋，定刻意安排，謝和弦直播後冇耐，老婆Keanna就上載一張超聲波相，疑似宣布懷孕！上面印有與Keanna一樣嘅出生日期，超聲波相攝於上月27日，當時胎兒6周3天大，數數手指，至今胎兒已7周6天大。不過Keanna未有承認胎兒係咪自己，之後亦刪除咗相片。