„Virun de Walen, ass no de Walen“ – an dëst Joer gëllt dat ganz sécher. Ech hat déi enorm Chance 2018, am Alter vun 26 Joer an d’Chamber no ze réckelen. Fir als jéngst Deputéiert dëser Verantwortung gerecht ze gi, war net ëmmer einfach, an ech sinn definitiv un dëser Aufgab gewuess.
Meng Themen déi mech ëmmer ugedriwwen hunn, war d’Chancëgerechtegkeet fir all Kand, d’Bekämpfung vun der Aarmut an den Ongläichheeten an d’Stäerkung vun der Zivilgesellschaft an dem Benevolat. 
All des Themen, si nach ëmmer extrem pertinent an dringend – a mir brauchen Politikerinnen an Politiker déi sech fir déi schwächst an der Gesellschaft an déi deenen hier Stëmm manner Gehéier fënnt asetzen.
Ganz konkret fuerderen ech e neie Modele vun der Familienarbeschtzait – fir dass béid Elteren méi laang Zäit kënnen doheem bleiwen wann hier Kanner nach ganz kleng sinn. Och en Congé bénévolat ass eng Fuerderung fir déi ech mech staark maachen, well et déi Leit valoriséiert an ënnerstëtzt déi sech fir d’Allgemengwuel an hirer Fräizäit engagéieren. Zu gudder Läscht, wënschen ech mer méi Bëschcrèchen an Bëschschoulen fir eis Kanner, fir dass si sech méi dobaussen beweegen kennen méi mat der Natur léieren kënnen.
Dir gesitt, no 5 Joer gi mer d‘Iddien net aus, au contraire – d’Erfarung mech als Politikerin kennen ze engagéieren, ass eng déi ech gären nach weider wéilt maachen: mat vill Häerzblutt, Engagement an Empathie fir déi, op déi et ukënnt.