【明報專訊】立法會選委界別議員江玉歡（Doreen，圖）去年加入港鐵擔任法律主管（物業），任職未滿一年，佢向Emily透露近日已經辭職，之後會轉番私人執業。Doreen話希望投入更多時間喺議會工作，又話「可能有啲嘢可以講得自由啲」，但強調同港鐵合作愉快，「完全唔係有任何唔開心，只不過人各有志」。
Doreen去年8月加入港鐵，主管旗下物業法律事務，佢話近日已經辭職，具體離職日子仍待商討。佢解釋，立法會議員任期尚餘大約兩年半（至2025年尾），時間唔多，希望專注議會工作，投放更多時間喺立法會。
改私人執業 強調非不歡而散
Doreen又話辭職後發言將更自由，「可能有啲嘢可以講得自由啲，例如房屋、發展、大廈管理，都係我好關注，希望私人執業後自由度大啲」。不過，佢否認身負港鐵職務影響佢發聲，強調同公司關係好，上司及董事亦明白其議員角色，支持佢嘅工作，辭職並非不歡而散。
被問到港鐵有否挽留，Doreen未有回應，佢暫時亦唔考慮以其他方式同港鐵合作。佢話將轉回私人執業，相信時間上會更自由。