城中鏡：怕咗班機延誤 名人各有對策
港航一班飛機日前受內地空管影響嚴重延誤，機上約七十名乘客不滿航空公司安排，通宵「佔領」航機。尋日喺沙田馬場見到唔少因公須經常往返內地嘅名人，講起航班延誤，大家除咗一肚氣之外，亦各自諗出唔少對策。曾經被延誤達二十小時嘅百仁基金主席李文俊就話，佢每逢真係有要事要到內地，都會「斬腳趾避沙蟲」提早一日出發。保良局前主席鄭錦鐘就會盡量專揀最早或最夜嗰班機，出現延誤嘅機會會細啲，各位讀者可以參考下。
袁振寧太太林藹欣（左）同父親林賢奇（中）等，齊齊現身馬場。
李文俊試過坐由廣州去三亞嘅航班，延遲咗足足二十個小時。
鄭錦鐘教路話，搭每日最早或最夜嗰班機一般好少遲。
梁青華對航班延誤一啲都唔驚訝，「準時先至係驚喜」。
「準時先係驚喜」
經常往來內地工作嘅李文俊話，最離譜試過坐由廣州去三亞嘅航班，延遲咗足足二十個小時咁耐！另一次由深圳飛重慶，更因為自己趕時間，被迫自掏腰包，即時買機票改搭另一班機。佢話明白機組人員都係打份工，大家都唔想發生呢啲事，唔應該難為佢哋，但經過呢兩次之後，佢依家凡有重要會議，都會提早一日起程，咁就點遲都唔怕囉。
轉頭撞到啱啱喺巴西睇完世界盃回港嘅香港鐘表業總會前主席梁青華同鄭錦鐘。梁青華對內地航班延誤問題一啲都唔驚訝，仲話「準時先至係驚喜！」佢試過有次由海南島回港，延誤超過十小時，惟有用航空公司提供嘅餐券食嘢消磨時間。至於鄭錦鐘就有準時小貼士，話每日最早同最夜嗰班機一般都好準時，搭咁耐都冇遲過，但如果有啲城市全日只得一班機，咁就冇符嘞。
從事旅遊業嘅縱橫遊業務顧問袁振寧就話亦受過航班延誤之苦，甚至試過飛上海無喇喇變咗飛深圳，甚至飛日本亦延誤長達十小時，最後要自己畀錢改搭翌日嘅航班，但係佢希望各位旅客明白，旅行社同航空公司都好唔想出現延誤，除咗因為可能要賠錢，仲會延誤其他行程同安排出現骨牌效應。佢建議香港考慮效法內地，立法嚴禁乘客「霸機」。
