BACOLOD CITY- Muling naghigpit ang Bacolod City sa pagsusuot ng face mask sa mga pampublikong sasakyan bunsod ng pagtaas ng bilang ng kaso ng COVID-19 sa kalapit na probinsya sa Iloilo City.

Nagpalabas ng kautusan ang lokal na pamahalaan ng Bacolod na mandatory face mask sa mga public utility vehicle (PUV) habang nauna na rin nagpalabas ng mandatory face mask ang lokal na pamahalaan ng Iloilo City lalo na sa labas ng bahay, pampublikong lugar, at pribadong establisyemento.

Ito’y matapos makapagtala ang Iloilo City Health Office na hindi bababa sa 84 na positibong kaso simula lamang ng pagpasok ng buwan ng Abril hanggang 23.

Hinikayat naman ng alkalde ang mga residente na magpa-bakuna ng COVID-19 booster shots sa lalong madaling panahon.

Taliwas naman sa Department of Health (DOH), na hindi mandatory ang pagsusuot ng face mask sa halip ay alamin ng publiko kung kailan at saan sila dapat magsuot ng kanilang face mask.

Kinumpirma naman ng DoH na ang kaso mula sa Iloilo City at asymptomatic at naka-recover na.

Samantala, ang Department of Transportation, naman pinapanatili pa rii mandatory ang paggamit ng face mask at mahigpit pa ring ipinapatupad sa lahat ng tren ng Light Rail Transit (LRT), Metro Rail Transit (MRT), at Philippine National Railways (PNR). Mary Anne Sapico

GENERAL SANTOS CITY- Tatsulok na pag-ibig ang isa sa tinitingnang motibo sa pagpatay sa police intelligence matapos maaresto ang babae na karelasyon umano ng una na siyang utak at gunman, noong Abril 20, sa lungsod na ito.

Ayon kay Police Brig. Gen. Jimili Macaraeg, Police Regional Office-12 director, lumalabas sa pagsisiyasat na may relasyon ang mastermind sa krimen na si Janna Perez at ang biktimang si Police Corporal Razul Alongan, intelligence operative ng Police Station 5, General Santos City.

Nabuko umano ni Perez na may iba pang babaeng kinalolokohan si Alongan kaya inupahan nito si Jengilito Sotto, 30, ng Barangay Poblacion, Sarangani province, para patayin ang pulis.

Matatandaan na binaril-patay sa loob ng isang restoran si Alongan Barangay Calumpang, ng nabanggit na lungsod.

Sa isinagawang follow-up operation ng mga awtoridad magkasunod na nadakip sina Perez at Sotto na na ngayon ay kapwa nahaharap sa kasong pagpatay. Mary Anne Sapico

BAGUIO CITY- Aabot sa P6.8 milyon ang halaga ng marijuana ang matagumpay na nakumpiska mula sa dalawang bigtime na tulak ng droga sa ikinasang drug buy-bust operation ng PDEA Cordillera, Baguio City Police at PDEA Region 2 sa Kenon road, Camp 7 dito sa nasabing lungsod.

Nagresulta ito sa pagkakaaresto ng dalawang suspek na kinilalang sina Arnold Atonen, 27-anyos, residente ng La Trinidad at Daryl Collera, 27-anyos, na nakatira naman sa Poblacion Bakun, Benguet.

Narekober mula sa dalawang suspek ang 57 piraso na nakabalot ng tape na tinatayang nasa 57 kilos rin ng pinatuyong marijuana na may market value na P6,840,000.

Nakuha rin mula sa dalawang pinaghihinalaan ang isang cellphone at itim na Toyota Hilux na hinihinalang ginagamit sa kanilang ilegal na transaksyon.

Nahaharap ang dalawang suspek sa kasong paglabag sa RA 9165 o ang Dangerous Drugs Act of 2002. Rey Velasco

MANILA, Philippines- Tatlumpu’t isang indibidwal ang dinakip ng mga tauhan ng Pasay police Sub-Station 1 matapos na diumano’y ilegal na magtake-over ng seguridad sa isang gusali kung saan matatagpuan ang embahada ng Estonia bago mag-hatinggabi nitong Miyerkules (Abril 26).

Kinilala ni Pasay police chief P/Col. Yahya B. Yusup ang mga inarestong suspek na sina Marlon Encinares y Puro, 45; Carlito Medalla y Gili, 57; Freddie Navarro, Jr. y Autero, 39; Francisco Gugol y Julian, 57; Racco Manaog y Ombrog, 22; Ryan Sanchez y Yadao, 31; Joy Paller y Bilawan, 31; Christopher Timajo y Escorial, 25; Neil Fereras y Pura, 33; Aladin Atendido y Abenir, 54; Arjay Cerilo y Valenzuela, 27; Rafael Rey Calunsag y Pabualan, 34; Gawan y Ruales, 29; Michael Escasinas y Dalino, 40; Arnold Andaya y Abejuela, 27; Arnel Casinao y Pedrabuena, 43; Abejille Bose y Lobino, 29; Bayon On y Aloba, 47; Noel Chavez y Borromeo, 30; Marco Lumibao y Macariola, 42; Precioso Anquilan y Maringal, 46.

Base sa imbestigasyon ng Pasay City police, dakong alas-11:50 ng gabi nang madakip ang 21 suspek sa CTC building na matatagpuan sa No. 2232 Service Road, Roxas Boulevard, Barangay 13, Pasay City.

Sa salaysay ng mga naka-duty na security guard sa nabanggit na gusali, dumating ang mga suspek dakong alas-11 ng gabi at pumasok sa loob ng gusali nang walang koordinasyon at pahintulot mula sa management.

Hinarangan ng mga suspek ang entrance ng CTC building sa pamamagitan ng paglalagay ng steel barricade kung kaya’t napilitan nang i-report ng mga security guard ang sitwasyon kay Honorary Consul of Estonia na si Consul Fernando Martin O. Peña.

Sa pagkakataong ito ay personal na nagtungo si Consul Peña sa lugar at nang walang maipakitang dokumento ang mga suspek sa kanilang diumano’y ginawang aksyon ng pagtake-over ay inatasan ni Peña ang mga security guard na arestuhin ang mga suspects.

Makaraang malaman ni Peña ang ilegal ang ginawang aksyon ng mga suspek ay agad itong tumawag ng sa CCP Sub-Station-1 kung saan kanyang ini-report ang komosyon at panggugulo ng mga suspek.

Agad namang rumesponde ang mga tauhan ng CCP Sub-Station 1 kung saan nila inabutan na naka-hold at inaresto na ng mga security guard ng gusali ang mga suspek.

Nahaharap sa kasong alarm and scandal o paglabag sa Article 155 ng Revised Penal Code (RPC) at coercion ang mga suspects na kasalukuyang nakapiit sa custodial facility ng Pasay City police. James I. Catapusan

TINGLAYAN, KALINGA- Tinatayang aabot sa halos mahigit P8.5 million ang mga pananim na marijuana ang sabay-sabay na binunot at sinira ng mga otoridad sa dalawang nadiskubreng plantasyon sa Buscalan, Tinglayan, Kalinga.

Sa unang marijuana plantation na napuntahan ng mga operatiba ay halos umaabot sa 20,000 piraso ng fully-grown marijuana plants na may standard drug price na P4 milyon.

Habang sa ikalawang nadiskubreng plantasyon ay nasa 25,000 piraso naman ng pananim na marijuana ang sinira na nagkakahalaga naman ng P4.5 milyon.

Ayon kay PMaj. Ruffy Manganip, tagapagsalita ng Kalinga Police Provincial Office, tinatayang nasa dalawa hanggang tatlong buwan ang laki ng mga sinirang pananim na marijuana.

Kung may makitang mga pananim na marijuana sa kanilang operasyon ay agad na itong bunutin at sirain upang hindi na dumami at maipuslit ng mga may-ari.

Hamon din aniya sa kanilang kampanya kontra iligal na droga ang pagtubo ng mga nahuhulog na buto mula sa mga binubunot at sinisirang marijuana sa lugar kaya hindi pa rin maubos-ubos ang marijuana sa kanilang probinsya.

Sa ngayon ay iniimbestigahan na ng pulisya kung sino may-ari ng nasabing plantation ng marijuana. Rey Velasco