不看絕對後悔！用滅蟲彈、BioKill 殺蟲水一定要知嘅 6 個常識！

夏天又嚟啦！唔少人都會開始買坊間唔同牌子嘅滅蟲產品，例如「殺他死」、「BioKill」等等，希望可以自己落手，盡早搞掂屋企嘅床蝨同曱甴（蟑螂）問題。但心急嘅同時，就好容易會忽視咗以下必須要知道嘅 6 大事項︰

一，滅蟲彈唔能夠殺滅床蝨。

美國時代雜誌（《Time》）早於2012年已經引述大學實驗報告，指出測試的三款滅蟲彈或滅蟲煙霧，冇一種能夠將床蝨殺滅，測試失敗 [1]。

二，殺他死只適用喺識飛嘅害蟲。

例如蚊、烏蠅等。而，曱甴、白蟻、床蝨全部都唔 Work，因為煙霧要完全釋放嘅時間較長，無辦法滲入牆壁嘅窿窿隙隙，而啲昆蟲亦會識得撒退，躲入地板、水管嘅深處，令問題更難根治。

三，殺蟲水好難殺死床蝨。

殺蟲煙霧同 BioKill 主要嘅成分係擬除蟲菊酯，床蝨除非被直接射中，否則就無咁易死。只要一塊薄薄嘅布阻隔一下，都足以令床蝨生存 [2]，更唔使講，床蝨好長時期都係藏身喺厚厚嘅床褥入面。

四，殺蟲水中嘅百滅寧並非完全無害。

雖然對溫血動物毒性較低，但被認為係環境荷爾蒙，實驗證明可能會干擾動物嘅內分泌系統 [3]。尤其百滅寧非常容易殘留喺傢俬、毛墊上面，又屬高脂溶性，就算洗幾次，都唔能夠完完完全去除。所以用嘅時候，大家就要小心啦！

五， 殺蟲水中嘅百滅寧對貓而言係劇毒。

佢會損害貓貓嘅神經系統，甚至會將佢地殺死。如果貓貓有以下嘅徵狀︰拍爪、皮膚或者耳朵抽搐，打滾等，就好可能係中毒。

六，BioKill 對水中生物有非常強嘅毒性。

所以記得千祈唔好對住魚缸、魚池噴。

引用資料

[1] http://healthland.time.com/2012/06/04/bed-bugs-vs-bug-bombs-the-bugs-win/

[2] https://www.thoughtco.com/when-should-i-use-a-bug-bomb-1968394

[3] https://www.ncbi.nlm.nih.gov/pubmed/15599112