女方放閃洩戀情！關楚耀暗撻「變臉」網紅空姐

東方新地 - 娛聞

更新日期： 2018年11月21日上午5:18

現年35歲的關楚耀（Kelvin）有個殿堂級唱片監製老竇關維麟同契爺譚詠麟照住，機會明顯比人多，事業大上大落都冇打沉信心，全靠一班圈中世叔伯背後支持，早前更有機會拍無綫劇《特技人》做男二，除咗事業轉旺，原來感情生活亦唔空虛，聲稱單身嘅佢今日被傳媒踢爆有個網紅空姐女友，不過新女是非多多，唔止被網友質疑佢用A貨名牌，仲搵到佢嘅舊相話佢「變靚」咗！

撰文：東方新地圖片：新傳媒圖片、Instagram、微博

關楚耀：個心唔想拍拖住

入行12年嘅關楚耀早前憑《特技人》演反叛富二代、Chok爆新導演入型入格，吸到唔少電視粉支持，成功一洗頹氣。今年8月，他接受本刊專訪大談感情生活：「當然有認識一啲異性，但自己個心唔想拍拖住，反而幾嚮往單身嘅自由，去邊唔使同人交代，幾鍾意種感覺。我覺得未遇到啱啫，遇到嘅時候就全心全意。」有多次被分手紀錄？「⋯⋯都係嘅，男女嘅嘢，無所謂嘅，女仔講分手先啫！」

緋聞女友多多

感情路上跌跌碰碰嘅Kelvin，09年和衛詩分手後，翌年便有圈外女友Megan Lee，然後16年再戀上韓國索模Miu Kim，可惜都係分手收場。

秘密遊東京

回復單身嘅佢不寂寞，火速又有新女友Joann Law，曾任模特兒嘅佢現職空姐，仲係一名網紅KOL，她的IG上有9萬4千多名粉絲，同Kelvin的9萬6千名粉絲數目差唔多。有指佢同Kelvin秘撻近一年，男方為免戀情曝光，Kelvin即使在社交網貼外遊相，都不會和女友同一時間上載，避免引起懷疑，相反Joann經常上載新照又提及自己有男友，好似早前Joann去了東京旅行連日以來都有喺IG貼相，其中一輯攝於主題樂園嘅單人照，雖然佢未提及同邊個去，但就留言：「分享一位很會拍照的男友他的作品 #你就是我的開心樂園」關楚耀幾張相都有畀like。