毛記大騷劣評如潮 腦細林日曦帖文道歉
受巴打同絲打歡迎的毛記電視昨晚(五月十一日)慶祝開台一周年,於會展舉行「萬千呃Like賀台慶2016」,全場八千個座位坐滿,有唔少圈人如HKTV老闆王維基、邵仲衡、利嘉兒夫婦、譚小環夫婦、周家怡、林夕等都有到場支持。
毛記出品,向來予人搞鬼有創意,但昨晚場騷就得來唔少劣評,觀眾表示場騷冗長又沉悶,打咗唔少個呵欠。 今早,腦細林日曦就喺facebook帖文,表示:「我當時係忍唔住,差不多同所有見到嘅朋友道歉,因為我哋做咗一個低於期望、好多甩轆兼非常冗長嘅Show出嚟,搞到悶親大家。佢哋都好好人,猛咁話點會呀,好正喎。而我知道,呢啲都係禮貌說話嚟啫。」他坦承個Show有好多問題,出咗好多意外,其中一個最大問題,係Cue騷方面出現嚴重錯誤,場口之間連唔埋,令氣氛一高,又死寂三十秒,斷下斷下咁,現場還可以氣氛搭救,睇電視就係一場災難。