打破舊有約會觀念！

好多女仔同新相識嘅男仔約會時，往往會不自覺咁想穩穩陣陣，例如會好抗拒唔係100%符合你理想條件嘅男仔，又或者喺初次約會時，節目總係食晚飯+睇場戲完事。其實有時進取啲大膽啲，參考以下嘅tips，可能會有意想唔到嘅收穫！

‧ 嘗試同唔同類型嘅男仔約會
你可能一直都只係會同一本正經嘅男仔約會，從來唔理嗰啲個樣吊兒郎當嘅花fit男，又可能你對貴族小白臉、體育男或者粗獷型男仔情有獨鍾，但無論你偏好係點都好，嘗試打破常規，同唔同類型嘅男仔date，包括嗰種你「睇落」唔係你杯茶嘅類型，你極有可能因為咁做而遇上驚喜！例如你一向鍾情運動男，但當你願意同一個讀書型嘅男仔出吓街，你可能會發現佢原來係非常風趣搞笑又博學，而且深深吸引你！或者你可以咁諗，若果你唔嘗試同各種類型嘅男仔約會，你未必真係知道自己想要咩、同咩男仔夾到。如果你不停同死一種類型嘅男仔約會，你可能就咁miss咗一啲能夠真正令你開心嘅男仔。

‧  約佢去一啲新奇、特別嘅地方
如果你嚟嚟去去都係頭先所講嘅食飯+睇戲嘅例牌節目，不如試下同佢去啲特別嘅地方，好似睇舞蹈劇、藝術展，又可以去一啲有樂隊表演嘅地方食飯等等，帶佢去一啲意想不到嘅地方唔單止可以引起佢嘅好奇心，仲可以避免死板又悶嘅「互相認識」過程。而且當你哋做一啲唔一樣嘅嘢嘅時候，大家都會較易放低防衛，好快可以輕鬆面對對方，就算只係約會過幾次，印象都特別深刻，好似彼此識咗好耐咁。

‧  用自己最真嘅一面去約會
唔怕俾佢見到自己最真嘅一面，盡情做自己，例如你不嬲缺乏運動細胞，但呢個新相識嘅男仔又好鍾意打羽毛球，點好？咪照去囉！無論你因咩事而覺得難為情都好，唔好一味搵藉口，面對佢！咁樣呢個男仔反而會覺得你好有趣，更吸引！男仔天生都鍾意新鮮、冒險，當個女仔願意嘗試新事物，就算未必handle得好好，男生們都會欣賞呢種願意放下身段去嘗試嘅女仔，儘管有可能會將自己嘅缺點表露無遺，但一個識得笑看自己缺點嘅女仔，反而令人覺得自信而且可愛，令男仔產生想了解你多啲嘅衝動！